由於近年出生率下降，特首「煲呔」曾鼓勵港人生育，呼籲啲夫婦要生3個才夠數。講真，雖然近年經濟環境好番啲，但係生3個喎，你估真係生嚿叉燒咩，話要就要。而且聽講每逢世界盃嗰陣，啲男球迷個個都捱眼瞓睇波，有幾多時間諗住生兒育女啲嘢？就算留喺屋企，佢哋都約埋成班豬朋狗友上嚟，邊睇邊玩啦，根本冇自己嘅私人空間。所以到下年2、3月嗰陣，出生率必然偏低。
咁樣點算呢？政府都唔可以坐以待斃㗎，我認為政府反而應該趁呢段時間加強宣傳，好似話如果啲夫婦喺世盃期間造人成功嘅話，可以有特別獎勵，例如增加呢對夫婦嘅免稅額，又或者有奶粉紙尿片贊助。我相信用呢啲積極正面嘅方法，一定令到啲有心生BB嘅夫婦，更加努力造人。
彭浩翔電影導演