全國政協主席賈慶林來港一行，一個例牌動作就係與名人影相。名人政要按重要性分開座位及企位先後，其安排一絲不苟，絕唔會俾一位無名小卒博懵攝位，座次安排實唔會出差錯。
一位名人久唔久就上京，據呢位名人K同左丁山講：「同領導人影相，當然晒番張大大嘅，掛在辦公室，威番吓。不過呢類相得嚟不易㗎，我一次上京，有幸隨團聽取最高領導人訓話及拍攝大合照。我哋成團人早兩個鐘頭就入到人民大會堂，聽從指揮，不准喧嘩，逐一按尊卑（即係一啲人嘅地位高啲）企好。如是者企咗成個幾鐘頭，只能細細聲同隔籬傾偈，直情企到腳軟，一啲老人家更慘，佢哋返到公司/屋企，大把人服侍，從來唔會罰企，但去到人民大會堂，只好乖乖咁企響度，唔敢去廁所，直情係受罪也。好嘞，企咗個零鐘頭後，領導人出場，向我哋演講五分鐘，然後埋位照相，影完佢就拜拜鬆人，我哋先至敢鬆一口氣。故此我張威水相真係得來不易，要好好珍惜。」
到咗北京，先知道官細，先知道一介庶民，無權無勢，只得低頭認命，主上肯賜相片一張，豈不感激涕零，不能自已。呢種心態，中國人有咗幾千年，已存在於我哋DNA之內，如果主上唔講，冇人敢改。
中國領導人幾時先至會「影相現代化」，視人民為平等呢？諗唔到。台灣方面或者會行先一步。記得十幾年前與傳媒團體訪問台北，例牌去見幾位內閣閣員，有錢復、馬英九、大陸委員會主委、僑委會主委等等，最後見行政院院長郝柏村，臨走前到總統府見李登輝，大家正襟危坐，與李登輝交談十幾分鐘之後，便要影張大合照，然後告辭，點知李登輝竟然話：「我同每一位單獨拍照。」此語一出，連總統府攝影師都為之愕然，當時李登輝入住總統府未久，如此客氣，人人都對佢留下好印象，焉知此人真面目尚未露出，後來先知佢厲害。