7月第一個交易日，係時候總結下孫柏文隻金手指，為大家篤嘅貼士喺第二季嘅表現。呢一季啲貼士表現對我來講，可以用以下嘅故事總結。由4月至5月初，股票、黃金、石油、白銀走勢凌厲，好似我喺一個典型嘅禮拜六晚落灣仔酒吧，見到酒吧充斥着靚女，仲要個個都肯同我搭訕。由冰島、新西蘭傳來嘅大跌市聲音，都只不過好似一個唔知情識趣嘅朋友，喺呢個時候走過來警告你：「呢個酒吧啲女仔好似有問題。」
到5月中至6月中，花旗國聯儲局主席伯南克開始發功，由一個大家都相信會開印刷機去瘋狂印銀紙嘅主席，成功變身成為「93年vintage嘅朱鎔基總理」，誓要用當年祖國「宏觀調控」嘅力度去打壓佢話嘅「因為原材料漲價而引發嘅通脹壓力」。
基金經理粉飾櫥窗
同時間，日本中央銀行亦將銀根收縮，將2000億美元從各大投機市場抽走。所有可以賭嘅，例如股票、債券、原材料等，即刻直線下滑。情況簡直就似我喺酒吧對住個靚女，突然用高音嘅聲線大叫：「WHAT？！你已經結咗婚！仲要有兩個仔？」
到6月尾，大家都已經不知所措，就連酒吧裏面嘅靚女有一對X染色體，還是係泰國來嘅ladyboy都唔肯定。不過去到6月最後兩個交易日，日本中央銀行將銀根由收縮變成放寬500億美元，兼有聯儲局6月會議聲明比5月嘅時候改咗幾隻字，基金經理就借勢炒起個市，等啲買咗基金嘅客戶，收到第二季基金成績報告嘅時候，唔會第一時間打電話去鬧個基金經理。咁好聽啲就係「粉飾櫥窗」（windowdressing），唔好聽就係「擺明呃人」（outrightfraud）。不過算數，因為冇佢哋「粉飾櫥窗」，我啲貼士表現都會好核突。以下就係我提供嘅三個投資建議嘅第二季表現。
白銀：大上大落，由4月初嘅11.5美元最高升過32%，不過去到5月回落，最低嗰日就係我哋特區時間6月15日凌晨，白銀見過9.48美元。我亦喺6月15日《蘋果日報》題為「重申一注獨贏買白銀」嘅《金手指》文章裏面，再叫大家買白銀。維持原本建議：強力買入。
中石油：都係大上大落，我仲係好鍾意中石油，目標價仲係$9.8。原本去到5月8日，仲估可以叫大家鳴金收兵，準備出貨，點知道去到$9.6就開始回頭，可惜。維持原本建議：強力買入。
花旗國國家足球隊：叫大家買佢做小組冠軍，點知完全敗北，道過歉，再道歉。建議：唔好再信花旗國足球！
孫柏文