人稱「花姐」嘅滙豐公關大員冼少嫻，喺獅子行工作咗19年，終於「上岸」榮休，歸家相夫教女。
其實花姐正處於當打嘅盛年，不過既然各方面條件配合，可以印印腳歎世界，當然係更好嘅選擇。獅子行雖然出名乜都講慳錢增值，但有時都好鬼有人情味，對待長期服務嘅忠心員工，就更加不乏溫情。
聞說公關部嘅同事，上周五特別喺滙豐41樓間TurnerRoom，搞咗個歡送會，唔少昔日同袍兼老闆，都專程嚟參加，好似滙豐工商業務環球聯席主管梁高美懿「貓姐」，同埋已過檔恒生任營運總監嘅薛關燕萍「多姐」等，兩位「姐級」老闆都有出席。
適逢當日銀行議息，恒生大班柯清輝梗係忙到出煙，但佢都好有心，人唔到電話都到，真係唔話得。華華喺度順道祝願花姐，榮休後更加如花似玉，心花怒放。