8號仔電盈單賣資產風波靜咗一陣，今日將會有新進展，事關董事會今日開會，代表中方嘅網通張春江，點樣同一意孤行要為小股東爭取權益嘅澤楷二少在會上過招，係好多傳媒同股東最想知嘅。
所以今日成班做電訊新聞嘅記者一定忙到暈，要分批駐守喺鰂魚涌電盈總部，又要昅住李澤楷在花旗中心個寫字樓，仲要偵騎四出，搵有份開會嘅董事索料，最慘就係唔知個會幾時先開。
更離奇係前日忽然有間叫「國安環球投資」嘅公司彈出嚟，話自己係中信國安嘅成員，正協助網通買起電盈嘅資產；搞到大家禮拜日都要開工。
之不過，中信同網通嗰邊都好似唔識呢間公司，究竟乜嘢料，大家都𢱑晒頭。
搵八國聯軍幫手
其實，阿二少想撇甩8號仔呢單嘢，已經係好耐嘅部署，話唔定網通當初入股時亦應承過佢做多啲嘢，但係結果乜都冇發生，咁咪搵八國聯軍幫手。
雖然阿爺發晒火，阿爸又唔高興，但二少素來特立獨行，老竇電話都可以唔聽，甚至佢親自嚟亦可以避開唔見。
點都要賣仔唔玩
嗱，現在我係要賣仔唔玩喇，各位董事，你哋想辦法諗掂佢啦，事在人為啫。
李華華
讀者如有任何意見或報料，歡迎發送電郵至[email protected]。