新加坡歌手許美靜之前喺新加坡麗嘉登酒店跟蹤一對中東男女上客房，發狂鬧人後，被送入當地嘅心理衞生學院，至今已經第九日，睇情況都未出得院。
本來警方要睇埋檢驗報告，先至決定係咪起訴許美靜，但原來病人喺醫院接受一至兩星期嘅觀察，係正常程序，所以到𠵱家都未知許美靜嘅命運會係點。
連日嚟有關許美靜嘅傳聞不斷，其中有指佢懷孕後，男友陳佳明又玩失蹤，所以佢先精神失控。
照顧病父消瘦
有位同許美靜合作過嘅李姓唱片宣傳，接受台灣傳媒訪問話今年三月份喺新加坡見過許美靜，當時佢好瘦，一啲懷孕迹象都冇，許美靜仲話因為照顧要開刀嘅爸爸，先至會瘦咗，當時李宣傳同許美靜講開有歌手想翻唱佢首《城裏的月光》，許美靜仲話版權係陳佳明嘅，佢可以幫手問問，之後仲傳咗兩個簡訊畀人，睇唔出有乜嘢唔正常。
至於另一焦點人物，許美靜嘅緋聞男友陳佳明𠵱家身在台灣，有記者去過佢屋企敲門，但一直冇人應門，而屋內嘅百葉窗就落晒簾。大廈看更就話兩星期前見過陳佳明，佢平時揸住黑色房車，出入都一個人。
