單睇《紫光元素》戲名，已估到電影大賣CG特技，古仔就用科幻嚟包裝，勢估唔到意料之外咁加入大量武打場面，而且仲係「打戲」連場，好鬼有《Matrix》Feel！不過主角由奇洛李維斯換成《第五元素》嘅美娜祖華域，一樣抽得似模似樣，以今個星期DVD界繼續避世界盃之際，《紫光元素》總叫一眾戲迷稍稍安慰。
記者：許福合
孖碟裝DVD/$130
單碟裝DVD/$98
VCD/$45
查詢：年代電影（27873612）
呢套《紫光元素》從未在港上畫，港人可能較陌生，不過咪以為佢係三、四線小製作，戲內一堆「超勁CG＋狠打」，真係有大片風範！
電影一開始就如《蜘蛛俠》咁加插漫畫做引子，可預期電影會好有漫畫風格，加上一定有製作實力，電影中出來效果又的確好特別，例如主角紫光，喺電影中無特別解釋原因，可以經常變色，而且睇來睇去唔知有咩作用，筆者唯一睇得明白係末段，衣服變紅應代表流血，咁樣表達都幾考驗觀眾思考性。另外紫光身上配備晒反重力裝置、基因辨識系統、3D立體投影、隨便就可在身上拎出大量武器，組合起來都幾多元化，淨係睇佢接下來有咩花樣拎出來已經夠好睇。
打位連場
全片最有印像都係劇中激鬥連場，仲要經常拎出唔同武器出來用，紫光本身就係一個流動彈藥庫，武器多之餘，仲好似射極都射唔完，一直可以有火藥跟敵人火拼！最有印象幾幕，係紫光打打吓，可以用槍來當武士刀咁用，又或者將槍分解，大玩二刀流。由於紫光為變種人類，戲中好打得過份，經常一對十都冇有怕，仲要好似趕場咁係幾秒內就可將十多個敵人打低，勁得誇張！還有一幕，因為用槍會俾政府一方發現，所以要以刀作武器，估唔到會出現唔少港式打鬥場面，雖然覺得女角「武技」有啲生硬，不過出來效果都算可接受。最過癮一場係紫光用上反重力裝置，騎住電單車竟然可以喺大廈牆壁行走，配合特技，可算戲中必睇位。
Bonus夠豐富
講到Bonus，《紫光元素》都算豐富，必有嘅角色同製作人，講吓拍此片感想同評語，女主角美娜祖華域就講到為咗演出此片，用咗一年時間密集訓練，甚至話好似奧運選手一樣，同時更練咗一副好身材咁話，難怪在片中，經常穿上性感戰鬥衣，大Show小蠻腰！Bonus碟內還有刪除片段，呢段更係必睇，因為有另一個開場片段，同正場比較，多咗幾個片段位，睇完正場再睇番呢個開場片段，對故事會更清楚。另外，片中主角經常穿上唔同衣服，原來都經過一番心思設計，碟內就有詳細交代。
激打必睇位
