六婆不嬲恃住有個導演男友，就以為自己高貴咗，不過佢喺節目講嘢嘅言詞依然都係咁粗鄙，話晒佢都係草根出身，已達中女年紀嘅六婆為咗縛住男友，梗係想生番個小朋友啦，不過生仔呢家嘢唔係話生就有得生。六婆身邊好友同關仁講，話佢𠵱家個女係喺美國打種，將佢男友嘅精子植入六婆子宮入面，如果唔係邊有咁易話有就有吖！𠵱家有女事成，難怪佢男友畀佢治到貼貼服服嘞。
花艇手緊出埠外賣
一向姣到出汁嘅花艇表面風光，其實內裏骯髒，仲經常送外賣。關仁知道以前花艇多數喺香港搵食，每次平均收費由幾萬到十幾廿萬不等，但最近唔知係咪風聲緊，成日俾狗仔隊跟，抑或係想搵多啲，居然放風話做出埠伴遊生意，開價每次連機票食宿要成50萬至100萬。另外，花艇坐飛機又要坐頭等，當正自己係天皇巨星咁，可惜到目前為止，只係有人問價冇人幫襯。
髮型師太太力挽人氣
模特兒界係女人圈，正所謂女人多是非，主動作料、爭上位、出風頭，絕對唔比電視台姐仔少。好似髮型師太太近年話積極作多方面嘗試，點知佢處女下海套電影票房仆直，關仁聽聞佢出席活動時，要搵助手主動𢱑記者做訪問嚟挽人氣，情況真係令人擔心。其實髮型師太太都好積極諗計，力保佢喺名模界嘅地位，好似有一次去行騷，做完rehearsal後，見到拆彈名模件衫最靚，居然同拆彈名模講要交換件靚衫嚟着，好彩拆彈名模係鬼妹仔性格，一啲都冇計較咋。
Textby關仁