六月二十五日本欄講及《鬧人最爽神》，指出當下潮流興批評，係唔係都鬧咗先。東九龍舊啟德機場規劃大綱公開咗，不出所料，即刻又有好多人鬧，例如：（一）點解要起一個大型運動場，（二）公園點解要大過維多利亞公園，（三）點解要起低密度住宅，得咁少人住，（四）與觀塘冇天橋連接，（五）挖掘海床會係環保災難……相信東九龍發展計劃到咗將近拍板之時，會有人提出二噁英……
都未開波啫，東九已經好似西九，燶味甚濃，假如東九規劃訂出（一）冇公園，（二）住宅密度好似將軍澳，（三）運動場似麥花臣球場咁細，你估啲議員與專業人士會唔會一樣鬧呢？肯定會啦。左丁山唔明白，東九龍開闢公園，大過維多利亞公園有何不可？低密度住宅唔啱聽，唔通成個舊機場起晒居屋？私屋？到時地產商會鬧推低樓價㖭！左丁山一向主張喺東九龍重建大型球場/運動場，落成後，拆咗冇用嘅掃稈埔大球場，用作豪宅用地，政府庫房有着數！起碼重新設計之下，東九龍運動場可以舉辦大型演唱會及其他運動，唔使俾附近居民投訴噪音。
官字兩個口，議員何嘗不然。世界盃開波後，警察破獲外圍波賭站，執到五千六百萬元波纜，比上屆世界盃多出一千八百萬，於是鄭家富劉江華鬧政府容許馬會開辦足智彩，未能有效打擊外圍波，言下之意，政府將足球博彩規範化，有搵笨之嫌。唉吔，尊貴的議員有所不知，馬會提供嘅足球博彩方式，唔夠款式，唔夠新穎，所以有人鍾意賭外圍。馬會提供新款投注方式又如何？尊貴的議員與泛道德派一定大罵馬會鼓吹賭博，刺激賭風，故此馬會投鼠忌器。假如劉鄭兩位尊貴的，肯大力支持馬會開辦一切可與外圍競爭嘅投注方式，馬會點會唔肯吖！益番庫房同慈善團體啫。