噚日7.1遊行，公民黨靈魂人物湯家驊同太太一點半就去到維園，佢話起初見到好少人，擔心冇人去遊行，但後來愈來愈多人，令佢當堂放心晒。香港人好醒，遲到唔會冇到，自動分流嘛。
前日中七高考放榜，湯大狀仔仔都係高考生之一，不過就唔見佢陪爸爸遊行，原來佢前晚睇波睇得太夜。八方問大狀囝囝考成點，佢話成績尚可，但未算喜出望外，不過囝囝有興趣繼承父業，日後做大律師，所以報咗港大同英國大學嘅法律系，但就未知收唔收，湯大狀當然擔心囝囝前途，不過無損佢喺7.1爭取普選嘅心情，仲同市民揮手及合照。
噚日八方提過湯大狀出咗本新書《不畏浮雲》，一百本存貨擺喺修頓球場前面一陣就賣晒。另一邊廂，程翔本《漫漫愛國路》都唔夠賣，買唔到嘅朋友唔使失望，可以去各大書局買。