「呢個銀包最好係多格數，可以放多啲嘢。其實我只係裝身份證同信用卡，我唔鍾意放自己嘅相入去，費事唔見咗畀人睇見我啲相啦！而且我一個人都有兩張身份證，又幾張卡，再放其他嘢銀包就會好厚，拎都拎得唔方便囉。我覺得一個銀包實用重要過個款靚。」
鄭融分隔外幣
「本來呢個銀包我諗住農曆新年先用，因為裏面有一個大袋，可以裝好多利是，不過之前我唔見咗銀包，惟有提早拎出嚟用。我揀銀包最緊要多格同夠大，我會放好多嘢喺銀包，包括VIP卡、麥當勞贈劵、相片、信用卡同買嘢嘅收據。另外呢個銀包有一個特別之處，就係佢放銀紙嗰度係分開兩格，咁出埠做嘢就可以將港幣同外幣分開，畀錢就唔會搞錯。」
周麗淇放埋門匙
「呢個銀包係我嘅生日禮物，我用銀包會用到爛先至換，我鍾意多格嘅銀包，不過幾多格都冇用，我實在太多VIP卡，所以點都用爆，惟有啲VIP卡唔袋喺身，寧願放喺舖頭度。放硬幣嘅間隔都好重要，我會將門匙放埋喺銀包度，所以以前試過唔見咗銀包，真係好慘，又要補領所有文件，又要cut卡。」
Rosanne添加卡套
「呢個銀包方便在大大個，乜嘢都可以裝得落，不論碎銀、信用卡同單據都得，拎起個銀包就可以出街，極之方便。我特別再加多個放卡嘅套喺裏面，咁樣若果出埠要換銀包嘅時候，拎起個卡套就得。講到銀包款式，我最着重係實用，唔在乎銀包嘅設計。」
採訪、攝影：王連連、馬建華
