亨泰（197）係基金大包圍愛股，亦食住內需大熱，現價預期PE得單位數，平得交關，WindowDressing過後，繼續要昅實。亨泰主打祖國消費品及農產品分銷業，集團喺內地批發及零售客戶網絡，遍及華北、華東及華南富庶城市，管理層又喺祖國經商20年，單係網絡及管理層嘅經驗優勢，已經係賣點。
亨泰06年度中期（12月止）純利微升1%到5223萬銀，主要因為集團喺期間擴充祖國分銷業，行政開支相應使多咗。但要咁睇，只要新分銷網踏入收成期，配合內需大熱，亨泰打後年度業績，可以好爆炸。再講，估計亨泰06年度純利只係溫和增長10%到1.17億銀，兼且因供股攤薄效應，預期PE仍然低企8字頭，重返今年頭高位1.37元，到時PE不過12倍，仲係平過好多呢期狂撻嘅內需股，但現價潛在升幅講緊47%，抵博冇？
麗豐唔怕跟
麗豐（1125）上星期五以過億股成交勁彈11%，有大成交配合升勢，唔怕跟。麗豐今年1月底止NAV0.73元，就算計埋集團呢期引入策略性投資者，配股後所呈現嘅攤薄效應，NAV講緊都有0.66元，現價（0.335元）折讓近50%，吸引到痹。再講，呢期麗豐引入大孖沙星洲嘉德置地，後者每股接貨成本價0.4元。即係話，麗豐要升近20%，先到大孖沙成本價。就當短打麗豐，博見成本價，已經有魚有肉。
錢雋