到了7月天，我沒有興趣睇世界盃，昂坪纜車開放又遙遙無期，迪士尼新遊戲又未推出，好悶！與其暴曬在30多度的戶外，不如約埋朋友走入機場酒店度假，唔只有得食和瞓，仲有好多嘢玩，夠癲足一日，再鏟埋入東涌outlet掃貨，咁就滿載而歸。7月初的星期日，玩小孩玩意，恍如變回小朋友，雖有點累，卻悶氣全消。
記者：馬靜兒 攝影：伍慶泉
Model：Clairol,Steve,P.C.&Peggy
暑假是黃金檔期，唔少酒店、商場都會推出很多優惠和活動吸引大、小朋友。機場酒店率先開始暑期攻勢，一個幾百元的住房套餐，不但包客房和三餐，還為一心度假的人安排節目，包括大腳板、畫Tee、自製蛋糕仔或曲奇、調校雞尾酒、踩高蹺等。周六更有技師幫你畫大花面、小丑扭氣球、製作繩結和水上大冒險遊戲。節目好似啱小朋友多啲，不過，即使大人如我和你，間中都愛做小朋友，至少玩大腳板的時候。
大隻腳考平衡
沒想過小朋友玩意都可以玩得好開心，看到大塊腳板，即想起平日玩的surfingboard和很久沒玩過的二人三足遊戲。遊戲非常簡單，兩個人一組，穿着令人唔自在的巨大腳板，睇吓邊組走得快。看似艱難，其實只要兩人一齊舉左腳，再到右腳便行，跟二人三足差唔多，不過唔小心一樣會……倒地。
泳池消暑降溫
玩到大汗淋漓，又可以到酒店泳池降溫消暑，不過在炎炎30多度的氣溫下，原本露天的凍水池即時變成暖水，但總好過乾曬，而且仲可以在池邊曬太陽，努力營造健康膚色。
美女廚房
玩得餓要食甜品咩？唔怕，有甜品師傅教路，幫手自製日式芝士蛋糕。做蛋糕都只是攪吓、撈吓，有幾難呀？無錯！因為有師傅和發蛋器幫手嘛！不過，原來攪得好的蛋白，真的倒轉都唔會跌落嚟，如果搽在手背上，更有緊膚作用，正！攪蛋、攪麵粉、攪到手軟都係為咗食。學鄭中基話齋：「美女廚房，食咗先講！」結果……好有芝士香味！
食勻30款菜式
呢個package包齊三餐，晚餐可選中式餐館龍門客棧食套餐。仲以為套餐一定唔多啱胃口，但出乎意料，中式套餐一人有一隻乾燒大明蝦和高湯海皇翅，其他30多款小菜、冷盤和點心任叫任食，質素都唔錯！食得飽飽瞓個好覺，朝早起床再食早餐buffet，臨走試埋日式餐廳美食，滿足到你唔信！
畫Tee顯創意
鍾意畫公仔的朋友，今次真係可發揮無限創意。酒店有畫tee玩意，平時嫌件衫周街有得賣，今勻可以將喜愛的圖案任意畫在tee上。成班model最初沒有甚麼idea，不過畫咗20分鐘後，大家覺得自己畫功可以媲美荷李活動畫。睇真啲，跟CarrieChow差唔多啫！應該可以賣到好價錢。
海盜美食搶灘之旅
地點：富豪機場酒店
電話：22868688
日期：即日至8月31日
費用：星期日至四：$488/位 星期五至六：$538/位
小童/長者：$258/位（包早餐、午餐及晚餐，不包加床服務）
（包括早餐、午餐、晚餐、大腳板、畫tee、焗蛋糕等活動，另周六有小丑扭氣球、畫大花面、製作繩結、踩高蹺及水上大冒險等活動。必須至少兩位成人入住一間客房）
逛Outlet買運動用品
購物狂嘅朋友，去酒店玩完一轉，不如順道搭車去埋東涌東薈城，那兒嘅商場有outlet，如adidas、NIKE、Bauhaus、CalvinKlein等十多間，包你shop餐飽！不過要留意，唔係每間舖都有超筍貨，推介有半價NIKE，鞋款和女裝選擇較多，連泳衣款式都是近兩季，尺碼算齊備，店員仲話每星期都會返貨兩次。adidas則主攻旅行袋，表面折扣不算多，但買3件再9折，買4件再8折，都算有so！
adidas（21093010）
地址：東薈城G06舖
NIKE（27079159）
地址：東薈城G02-03舖
