今周出擊，揀永樂電器（503）。
最大理由，係永樂跌得太殘，落後太多。永樂去年10月以2.25元招股，今年4月最高4.30元，前周最低1.82元，較最高價低近6成。上周五收2.025元，圖表走勢已見圓底兜上，1次講緊幾十巴仙嘅爆升就在眼前。
永樂係國內No.3家電連鎖集團，僅次於國美（493）與蘇寧。以上海市場計，永樂則係No.1，佔上海市場50%。
家電市場好掂
國內賣家電（唔係生產）掂唔掂？睇吓一啲數據與事實。
國家信息中心統計，06年首季，國內家電銷售額935億元人民幣，較去年同季增近14%。國家宏觀調控，只係㩒住過熱投資，唔係打擊消費。國家領導人講過多次，要以消費帶住經濟走。國內銀行加息，都係在借錢方面着手，唔係在存款方面着手，唔想影響消費。家電銷售市場前景，你同我定。
再睇業內動態。外商如沃爾瑪（市值1.566萬億港元，大過005滙豐控股），家樂福與家得寶都紛紛在國內建立橋頭堡。最近，美國No.1家電連鎖集團BestBuy（「百思買」，市值2077億港元），亦落實與國內No.4家電連鎖商五星電器合作，在五星來港上市前入股，合組公司，在國內大展拳腳。
國內家電市場呢塊蛋糕如果唔靚，又點會有呢啲活動？
BestBuy與五星合作前，曾與永樂斟過，只不過永樂已經上市，BestBuy覺得進軍國內市場方式與原意不符，先至搵五星做拍檔。
永樂在上市前，早已在兩年前引入大摩做策略股東。今年4月尾，大摩與永樂管理層，共配售3.69億股舊股，每股作價3.225元。亦因為呢次配售，搞到永樂股價變成大頭佛，倒水咁跌。
大摩同管理層減持，唔使睇得咁淡。大摩4月減持2.24億股後，5月初又以每股2.70元增持番，手法明顯係高沽低買。現時，大摩仍持有永樂14.99%（價值7.09億元），永樂主席陳曉持有52.58%（價值24.86億元）。股價如果長期低沉，佢哋損失最大。所以佢哋在低於配售價繼續回購，可能性好大。
大摩必有後着
仲有1個可能，係大摩會將手上嘅永樂，大批或成批賣畀有意做永樂大股東之一嘅外國家電集團，完成做策略股東任務，而作價一定唔會低過上次每股3.225元配股嘅價錢。呢個發展如果成為事實，對永樂股價嘅刺激作用，肯定好大。總之，大摩必有利於自己同股價嘅後着。
05年度（12月年結），永樂營業額122.46億元（人民幣．下同），增56%。純利2.89億元，升45%，每股盈利0.173元。06年，憑生意覆蓋市場與門店數目同增1.1倍，及繼續得到經濟規模效益之利，加上出售核心業務獲利，盈利肯定續增，但因股數增加，每股盈利預測倒退1成至0.156元，預測PE12.6倍，相對於國美嘅18.7倍，抵買得多多聲。國內其他消費股與零售股，PE普遍23倍過外。永樂拍埋去，又係贏晒。
永樂與家電及電子消費品主要製造商直接聯繫，透過直接採購，節省開支，正加強物流管理，最近在上海青浦建物流中心，未來毛利率將可提高。發展物流業務及擴大分店數目，全無困難，事關集團揸住淨現金近30億元。
永樂已經跌到殘，業務冇問題，隨時反攻，反彈第一站2.30元，然後2.60元。中線目標3.225元，即係4月尾配售作價。現在上車，有機會賺6成。
高彰坡