第2次喺多蒙特見證德國淘汰對手，有線直擊隊都係返同一間酒吧做直擊，酒吧老闆見我哋咁好腳頭，佢就邀請定我哋4強再去做直播，仲話請我哋免費飲啤酒㖭，你話幾爽呢。
德國對阿根廷呢場大戰雖然唔喺多蒙特度打，但係多蒙特嘅氣氛一啲都唔差，因為呢場係東道主德國嘅賽事嘛，實多德國fans喺度打氣。大電視廣場3萬座位一早爆滿，要睇波嘅惟有幫襯吓酒吧或者餐廳。有線直擊隊今次喺同一間酒吧門外進行直播，實在係因為嗰度接收衞星訊號好啲啫。
高路斯入波即請飲酒
酒吧老闆好好人，次次都畀我哋擺隻巨型天線喺門口，等我哋可以順利進行賽前球迷嘅直播訪問。到咗比賽開始時，由於酒吧門外已坐滿晒客人，酒吧老闆就招待我哋入埋舖頭，一路睇波一路飲㖭。
東道主上場，睇波氣氛又點會唔好呢？不過，當阿根廷領先1球之時，全間酒吧就靜左一陣，球迷緊張嘅心情清楚可見，尤其酒吧老闆更加望住個電視發呆，有客人落柯打都唔理。好彩高路斯完場前10分鐘扳平，全場球迷重燃希望，酒吧老闆亦當堂生猛晒，仲走過嚟熱情招呼，請我哋免費飲一round，真係好識做生意。
德國最後不負所託12碼射贏阿根廷，包括老闆在內嘅所有德國球迷開心到好似中六合彩咁。今次再嚟呢間酒吧，好彩我哋有腳頭繼續好運，連帶老闆都主動叫我哋下次再嚟免費飲啤酒。
有線06世界盃嘉年華，將於4日晚11:30pm——午夜1:30am，播出世盃外景隊採訪滙報
