鄭嘉穎雖然俾戴思聰嗰份賣身契搞到瞓唔安坐唔樂，但正所謂塞翁失馬焉知非福，呢單嘢曝光之後，佢事業運反而好轉，頻頻有外快搵之餘，佢擔正嘅《天幕下的戀人》同《飛短流長父子兵》都有唔錯嘅收視。
冷落劉丹祥仔
為獎勵嘉穎同《飛》劇一班幕前幕後，無綫高層樂易玲同曾勵珍專登請佢哋去銅鑼灣西苑勁擦，有高層疼錫嘅嘉穎成晚好似主人家咁周圍敬酒，心情靚絕啦！
嗰日樂易玲同曾勵珍喺西苑包咗間房請食飯，成班《飛》劇演員嘉穎、陳松伶、劉丹同黎耀祥都有嚟勁擦一餐。關仁平時見嘉穎鬼咁文靜，唔多出聲，但大前晚佢竟然成隻飛蛾咁滿場飛，不停夾餸俾身邊嘅松松、珍姐同樂易玲食，又幫其他演員同工作人員斟紅酒；之後，嘉穎仲主動拎起杯酒同大家敬酒，唔講真係以為請食飯嗰個係佢㖭！
食完飯之後，珍姐同樂易玲捉住嘉穎猛咁密密斟，冷落咗祥仔同劉丹，搞到佢哋要企埋一邊煲煙傾偈解悶，鬼咁冇癮。
Textby關仁
