剛踏入青春期的田啟文（田雞）已開始發明星夢，由茄喱啡捱起，捱足27年，如今位列星輝策劃總監，無論幕前幕後，均與星爺周星馳拍檔搵食，兩人既是賓主也是戰友。01年拍電影《少林足球》，田雞不慎傷腰，但他最後仍抱着大無畏精神上陣拍一場被圍毆戲份，力撐星爺。 撰文：比華利
第八話：田啟文
現年46歲、自認奇貌不揚的田啟文，未加入娛樂圈之前，明知要靚仔靚女才可以輕易晉身幕前，可是他仍然不死心，尋找門路加入娛樂圈。15、16歲時，田雞在酒樓當樓面，認識了當時尚未與查小欣結婚的李學斌。田雞知道對方是香港電台播音藝員，一心以為可以藉其幫助闖娛圈，他說：「佢成日嚟飲茶，後嚟熟咗之後，有日佢同我講：『細路你好有前途，大把機會，努力啲！』我咪諗住可以乘機搵佢幫手介紹我入行、發吓明星夢囉。」
可惜田雞向李學斌多番暗示，仍未獲對方提攜。19歲那年（79年），田雞終於「的」起心肝，加入麗的（亞視前身）由茄喱啡開始做起，雖然待遇麻麻，但總算邁開第一步。田雞說：「一日得30蚊，如果醒目多句對白講就多10蚊。」
傷腳被飛周身債
及後田雞跳進大銀幕，可惜星途崎嶇，後來轉到一家電影公司出任高層。86年，田雞拍戲傷腳，被迫休息，此時電影公司卻指他虧空公款「走佬」，更拒絕支付田雞之前為公司墊支的款項。事業失意，就連愛情也遇上滑鐵盧，慘遭女朋友離棄。
田雞說：「嗰段日子好黑暗，我要典當度日，將值錢嘅金鏈拎去當，因為冇錢做物理治療，惟有自己喺屋企做。不過後尾我諗，我生出嚟嗰陣夠乜都冇啦，𠵱家起碼仲有屋企人，於是立心養好傷就發奮振作，結果淨係醫隻腳都花咗九個月時間。」傷癒後，田雞就靠着這雙腳，重新站起來。94年拍攝電影《九品芝蔴官》與周星馳結緣，兩人一拍即合，成為幕前幕後的好拍檔。
「大不了唔再合作」
跟隨星爺工作多年，兩人合作多部電影，現任星輝公司的策劃總監，合作無間。問他可曾跟星爺試過有拗撬？田雞說：「我記得拍《少林足球》嗰陣（01年），我哋每日開工休息都一齊，有場戲講我俾人打，我條腰真係拍到受咗傷。有日收工，我自己去咗睇醫生，然後一個人食飯，點知最後都喺食肆撞番周生，佢問我去咗邊，聽到我話骨膜有事，佢就叫我唞吓，不過當話題一轉到部戲，佢又猛同我講要拍好啲嗰場打戲。」
當時田雞的腰患還隱隱作痛，故他坦言：「嗰刻我真係個心涼咗一截，到底自己係咪入錯行？經過一晚大覺瞓，我本住唔怕死嘅大無畏精神，頂硬上又繼續拍落去。」
儘管友人均覺得星爺苛刻而戥田雞不值，更鼓勵他反抗，但EQ極高的田雞說：「我猛問自己點解周生嗰刻只係對我有特別要求，佢都係賞識我畀機會我、係為我好啫，我嘅心態係做好呢一刻，大不了最多下次唔再合作。」
