「呢個銀包係朋友送畀我嘅生日禮物，我鍾意個銀包嬌小玲瓏得嚟又擺到信用卡、提款卡同相，平日去街就算唔帶大袋，都可以將個銀包擺喺衫袋或者褲袋度，所以我好少用啲長size嘅銀包。」
袁文傑失而復得
「我向來都有買呢隻牌子嘅銀包嚟用，基本上入行之後，都一直用呢隻牌子，當初第一個係朋友送畀我做生日禮物，咁自己又覺得好似個牌子都幾旺我，試過有幾次唔見咗都可以搵得番，有時啲朋友或者同事執到，都知個銀包係我嘅，因為佢哋都知我用呢個牌子。」
陳展鵬五年情迷
「呢個係以前女朋友送嘅，咁佢一個、我一個嘛，分咗手後我都可以繼續用啩，用咗都成五年喇，男仔用都幾好，細細哋唔會太麻煩，我唔係好鍾意太大嘅銀包，覺得袋得唔係咁方便，而且呢個牌子嘅嘢都好耐用，顏色方面我都覺得可以襯到唔同嘅衫。」
鄧健泓平實低調
「我咁大個仔都未買過咁貴嘅銀包，呢個銀包係上年聖誕節我個妹送畀我，我為佢供書教學咁耐，都受之無愧嘅。我鍾意呢個銀包個款夠平實，同我一樣咁低調，裏面仲有一格可以擺相，平時會擺啲狗仔相喺度，今日啱啱去攞回鄉證，所以就擺證件相。」
採訪、攝影：卓美娟、王崇穎
