香港地人人有壓力，秋官和寶珠姐做舞台劇，壓力更超出想象。《天之驕子》節奏緊凑，很有電影感，燈光、場景要即時轉位，演繹難度大增。
寶珠姐說：「壓力一定有，成日驚唔記得台詞。我之前做《劍雪浮生》時試過發台瘟，去到嗰個位唔記得台詞，個腦一片空白，驚到嗰心都跳埋出嚟，點算？咪跳咗嗰句唔講咯，所以一定要排多啲，熟能生巧，突然唔記得一句，都唔會甩。觀眾唔係晚晚睇嘅應該唔知，但連續睇幾晚嘅fans一定會知，嗰晚我成晚耿耿於懷。」
鹽水漱口鬆喉嚨
復出之後，寶珠姐學識了如何放鬆自己，她說：「我退出咗20幾年先出返嚟做《劍雪浮生》，娛樂界同新聞界都同當年好唔同，我覺得好唔適應，以為做完呢次就唔做，但睇到身邊好多人都識得放鬆自己，開始覺得自己太緊張，所以慢慢改咗。𠵱家做訪問，我識得自己發言，以前多數係媽咪發言，要我對答就口窒窒，問一句答一句，內容好枯燥，𠵱家我就叻咗好多。」
據知情人士透露，平時妙語連珠的秋官，綵排時神情肅穆，不停記對白，沒有人敢埋身講廢話。秋官說：「今次啲歌好難唱，又快又高音，講吓對白又要唱吓，所以我每日以鹽水漱口放鬆喉嚨，平時我都會飲吓參茶，飲水就飲暖水，一定唔飲凍嘢。」
後記：
寶珠姐要求和秋官一起做訪問，會令她感覺自然些。叫兩人互講對方的缺點和優點，秋官說：「我同寶珠係天作之合完全擦出火花。寶珠嘅優點係靚啦，可愛啦，做手同造型都靚啦，個個人都鍾意佢啦，人緣好啦。缺點就真係冇咯，要講都係太靚啦，太可愛啦……」而寶珠則說：「同秋官合作好多笑料，秋官好識照顧人，帶畀人好多歡樂，而且份人好易話為。佢嘅缺點？咪口花囉！」
攝影：林德雄 場地提供：霞飛路
服裝提供：巴黎世家（鄭少秋）