呢輪三色台雖然晚晚播隔夜波，但勤力人同阿嬸以及聰明人嘅是非就日日新鮮，簡直同世界盃一樣咁精采。原來，聰明人做三色台講波節目，原先被安排坐喺邊疆位置，同勤力人隔到冇雷公咁遠，聰明人知道之後，唔甘心做勤力人嘅大茄，於是使橫手叫人幫佢調個靚位，結果畀佢攝咗上去勤力人附近位置，勤力人知道之後，梗係覺得篤眼篤鼻啦！
懶醒老雀激嬲老闆
演而優則導嘅老雀，同落雨電影公司簽咗幾套片約，老雀做第一男主角嘅戲早排已經上咗，票房都算唔錯，弊在佢激嬲咗電影公司老闆好光。唔知係咪因為老雀做過導演，拍呢套戲嗰陣成日改劇本，拖慢晒個進度，本來好光已經覺得老雀啲戲屎，加上聽到老雀周圍同人講話啲對白好老套，劇本係老闆好光寫嘅，佢聽到梗係佛都有火啦，落雨電影公司睇怕都唔會再開戲畀老雀咯。
過氣字母嫂巧製肚臍
過氣字母嫂成日俾人話整容，除咗隆胸、隆鼻同瘦面外，原來佢連肚皮同肚臍都整過。關仁好好奇，肚臍點樣整呢？原來過氣字母嫂以前地獄減肥，成個人瘦晒靚晒，但就搞到肚皮起摺，佢搵整容醫生商量有乜方法可以令個肚冇咁核突，可以着三點式嚟見吓人，於是醫生幫佢將起摺肚皮叠起縫埋，但又會遮住咗肚臍，惟有割一個假肚臍出嚟，所以佢粒肚臍寧舍特別！