我鍾意食魚，乜魚都好，只要新鮮好味，由頭至魚尾連皮拆骨自己可以擦一條。細細個聽娘親話食魚皮以形補形，食得多皮膚都會滑溜啲，我信，更信深海石斑魚皮一定更嫩更好味。以為魚皮煮法只有乾炸？No喇，蒸得，凍食得，加脆漿落鑊炸都得，只要係塊好魚皮，就點整味道都咁得！
記者︰方綺君
攝影︰陳偉強
模特兒︰Cat（Salvador）
海鮮保證生猛
「龍皇酒家」，龍皇龍皇，名字夠氣派，想不到新推出嘅石斑魚皮菜菜名一樣先聲奪人。沙當尼汁焗星斑皮、百子龍衣、青紗紅袖，單聽菜名字已經夠殺，一見賣相我已經知道好食。採訪，見董事長幟哥，接過卡片，先知佢原來來頭唔小，中國十大名廚、國際烹飪大師、法國廚皇會名譽主席……難怪創作出嚟嘅魚皮菜睇得又食得。
大廚權哥話：「幟哥用咗幾日時間就諗得掂星斑魚皮菜5個菜式，我都寫個服字呀。」除咗煮得，幟哥對海鮮亦甚有研究，因為佢同澳洲海鮮批發商好熟絡：「我喺沙巴仲有幾艘漁船，而且經營批發，入嘅魚當然至靚啦！」難怪魚缸內嘅海鮮咁生猛，海鮮生猛，好味就必然喇！
廚師挑戰高難度
煮星斑魚皮有乜難度？幟哥話：「只要條魚新鮮，魚皮就唔會腥，而且一定要用海魚，魚皮比較煙韌有嚼勁，但製作時要非常小心，尤其係百子龍衣呢度菜，力度大啲啲都會整爛魚皮。」
入廚房，見幟哥同權哥兩三下手勢，唔使20分鐘，5個魚皮菜式已經上碟，勁！除鍾意挑戰高難度，佢哋亦對巨型海鮮情有獨鍾，7月17日仲會推出一個「龍皇巨鯊全宴」，用150斤重嘅大鯊魚炮製鯊魚宴，今次仲畀我先睹為快，率先試食其中兩個鯊魚宴菜式，嘩，我覺得好榮幸呀！
教你揀星斑
星斑是種居於珊瑚礁一帶覓食的一種石斑，味道鮮甜肉質嫩滑，無論炒煮燜皆適宜，營養價值極高。星斑肉內含豐富蛋白質，脂肪量低，主要是由不飽和脂肪酸組成，不但容易消化吸收，而且不會導致膽固醇過高，比一般魚肉較多鐵、鈣、鏻等多種無機鹽，有排毒作用。幟哥教路︰「點揀星斑？魚身要紅中透白、修長纖瘦，重量約1kg就最好食！」各位太太們下次買魚記住喇！
解說
「深海石斑──好瘀！」石斑肉質肥美鮮嫩，當然是貴價好魚。這歇後語玩的是諧音，中文就有個好處，單字單音，玩諧音易如反掌，以後有人說你是「深海石斑」，別高興，因「魚」與「瘀」同音，這不是讚美，而是揶揄嘲諷你「好瘀」，明白沒有？
百子龍衣2位用$128
揀稍為大塊嘅魚皮，裏面嘅葱粒、菜粒、菇粒同魚肉等餡料經過特別處理，唔會出水影響口感同賣相，包到成個波咁，外形趣致可愛，魚皮煙韌彈牙，靚到唔捨得食呀。
a.沙當尼汁焗星斑皮4件$148
我嘅至愛！落鑊炸嘅脆漿做得夠薄身，入口清脆乾身唔油膩。師傅特登減短油炸時間，先有外脆內滑嘅效果，再灑上用Chardonnay白酒製成嘅沙當尼汁，完全帶出到魚皮嘅鮮味。
b.魚躍龍門$198
好刁鑽嘅一道菜，乳白色湯底用星斑魚骨熬製而成，熬完再用嚟煮魚尾同魚頭，味道鮮上加鮮，齋飲得撈飯又得。由於製法繁複，呢道菜式限量供應，想食，打個電話預訂喇。
c.龍皇牡丹蒸
7月17日開始供應嘅鯊魚宴其中一道菜（共12道菜每位$498），鯊魚皮雖然有成1厘米厚，不過絕對唔韌，口感嫩滑似花膠。用蟹皇蒸海鮮夾海鮮，魚味唔會俾蟹味掩蓋。
d.麒麟吉品乾鮑扣
同樣係鯊魚宴其中一道菜，日本十八頭吉品鮑處理方法複雜，要先浸水4日，再燜煮4日，最後焗多兩日兩夜先完全出味。鯊魚皮味道比較清淡，唔會搶走吉品鮑香味。
e.青紗紅袖$78
凍食，星斑魚皮先拖水後過冷河，咬落好彈牙無腥味。夾一箸，青瓜絲同沙田柚肉一齊塞入口，爽口到爆！跟碟嘅特製醬汁用青檸、醋、糖製成，酸酸哋係最佳嘅開胃小菜。
f.火龍吐珠$268
火龍果裝住嘅係石斑脊肉，由於火候控制得剛剛好，火龍果唔會出水影響魚肉鮮味；脆炸嘅係魚背脊兩邊對落嘅魚身肉，魚身郁動比較少，肉無咁嫩點粉漿脆炸啱晒數。
搵食攻略
龍皇酒家
地址︰灣仔軒尼詩道33號皇悅酒店地庫2層（28669932）
油麻地碧街41-43號地舖（27715821）
營業時間︰11:00am-11:30pm
人均消費︰$300-$400
交通︰銅鑼灣地鐵站A出口，往金鐘方向前行直達；油麻地地鐵站碧街出口，步行3分鐘直達
