舞台劇《天之驕子》中，鄭少秋和陳寶珠這一對雖相愛不能相認，最終仍能大團圓結局；現實中，當年寶珠姐和呂奇、秋官和森森的戀情，則成為舊社會的犧牲品。往事並不如煙，且聽寶珠姐娓娓道來，並感謝呂奇仍關心自己；至於提起那個被認為是「情場老手，欺騙無知少女」的時代，秋官仍相當激動。 撰文：張止寒
陳寶珠和鄭少秋，同是59歲之齡，20多年前寶珠姐退出後，兩人20多年沒有見面，直至今次合作舞台劇《天之驕子》。劇中兩人是青梅竹馬、並訂有婚約的初戀情人。因父母被抄斬，寶珠女扮男裝混入宮廷伺機報仇，重遇秋官卻不敢相認。要他們演活青年時代既澎湃又壓抑的情懷並不困難，因為他們亦曾經歷過。
粵語片時代，呂奇和陳寶珠在水銀燈下周而復始談情說愛，彼此漸生情愫，但礙於呂奇有妻室，陳寶珠不願做第三者，於是藉赴美留學而斬情絲；1970年，鄭少秋和森森拍拖，女方母親得知秋官已有一女，堅決反對，棒打鴛鴦。
（秋：鄭少秋 珠：陳寶珠 記：記者）
秋：我同寶珠呢一段係要生要死嘅愛情，佢欺君扮男人，我願意同佢一齊死，呢種精神上嘅戀愛係最昇華嘅。喺戲入面我未見未婚妻就要出戰，都唔知有冇機會返到嚟，所以趁未出戰見一見先，一見面我哋就交換訂情信物，佢送我一把寶劍，我送佢一塊碧玉，跟住就開始咗牽腸掛肚嘅愛情，雖然連手仔都未拖過，但嗰種夢魂縈繞嘅感覺係最吸引嘅，好值得回味，同現代男女一開始就打真軍，跟住就大結局好唔同。𠵱家嘅後生仔，拍拖但求順手，唔識得珍惜。
情場叛逆者
記：秋官你嘅感情生活多姿多采，有邊段情你覺得最昇華？
秋：梗係官晶華啦！有第二個都唔講你聽啦。我同官晶華係緣份，月老一早定咗，佢喺適當嘅時機出現，就係咁，至於阿寶珠嘅適當時機就嚟緊。
記：當年你同森森，據聞係佢媽咪大力反對，所以冇得開花結果，你係咪好遺憾？
秋：嗰陣我後生，得20幾歲，我喺嗰個年代絕對係叛逆者啦！（提高聲線）俾人話我係情場老手，欺騙無知少女！咁嗰陣作為森森媽咪呢個角色，唔接受我係啱嘅，不過我就覺得好慘咯！一講到呢啲，我嘅反應梗係會激烈啲、強啲嘅，所以都唔係好想提，唔想影響人。人總會維護自己嘅，但維護自己嘅時候，又唔多唔少會傷害到人。人哋係啱嘅，邊一個會想自己個女咁呀。況且嗰陣又覺得談情會損失工作，多少受舊式思想影響，驚拍拖會冇咗fans，咁以前嘅辛苦咪白費。
從來冇人追
記：之前呂奇接受訪問，言談間都好掛住寶珠姐，仲話你應該搵個伴，寶珠姐你有冇睇呢段報道？
秋：寶珠咁好嘅女仔邊個唔掛住呀！
珠：我冇睇呢個報道，但有朋友話畀我聽，多謝佢仲關心我。自從我退出之後，20幾年嚟同佢完全冇聯絡。嗰陣大家一齊拍戲，同佢可能拍檔多啲，接觸多傳聞亦都多咗。
記：傳聞當時你媽咪反對？
珠：當年都唔係話因為我阿媽反對，媽咪係覺得我唔可以同任何人拍拖，一拍拖就冇心機做嘢，而且佢係有家室嘅。
記：咁你𠵱家對愛情仲有冇fantasy？
珠：𠵱家我都一把年紀咯，愛情呢樣嘢冇諗，我有媽咪、囝囝同埋朋友陪，生活都好開心，但係又唔可以話我完全對愛情冇fantasy嘅，唔係我話咗冇，突然間又有咁點算呀！如果有嘅話我唔會抗拒，緣份嚟到都抗拒唔到啦，不過𠵱家冇就唔需要牽掛，可以專心做嘢。
記：寶珠姐你係咪好難追？
珠：我一直以嚟都唔明，點解我會冇人追？由後生到𠵱家都係咁，梗係冇人追我，唔通我真係唔似女仔？以前真係有諗過呢個問題，咁耐以嚟，冇人正式追求過我，好奇怪。就算係我前夫，都係偶然去登台，朋友嚟探我帶埋佢嚟，呢啲咪緣份咯，咁啱我媽咪嗰陣又開通話畀我拍拖，好開心。可能我嘅生活圈子好窄，圍住我嘅都係朋友，有陌生人在場我都唔去食飯，我好怕應酬。
記：你對另一半有乜嘢要求？秋官呢類風趣型啱唔啱？
珠：呢啲真係要講緣份，唔可以話要指定邊一種，通常話鍾意嘅類型，往往到拍拖時係相反嘅，以為鍾意幽默多嘢講嘅，點知搵咗個沉默嘅。
記：其實你哋生於同一個時代，經歷都有啲似……
秋、珠（異口同聲）：爭好遠！
珠：佢啲感情生活咁豐富！
秋：我係講事業爭好遠，我拍電視，你拍電影喎！
珠：電視好緊要㗎！
錫面都唔得
記：寶珠姐你啲fans追隨你咁多年，其實你會唔會因為fans，所以改變自己去做佢哋心目中嘅你？
珠：我嘅fans係比較忠心，一直以嚟我同啲fans一齊長大，佢哋嘅思想係比較守舊，啲fans好抗拒我同男主角親熱，人哋黐埋啲，就話人揩油，同男主角最多拖手同擁抱，kiss從來都未試過，蕭芳芳同謝賢就有，佢哋外型各方面前衞啲、新潮啲，又時髦過我。我到𠵱家都未試過螢幕初吻，我真係唔得，就算𠵱家有呢個機會，對住陌生人幾大唔得。
秋：等我同監製商量吓！
珠：連錫面都唔得㗎！我啲fans一直唔接受，到𠵱家都係。但我從來唔會因為fans改變自己，我份人就係咁，從來唔會心野，嗰陣媽咪比較嚴，比較守舊，但我習慣咗，我自己嘅性格亦係咁，從來冇諗過話要放啲，叫我熱情啲，我都過唔到自己嗰關。
記：囝囝（楊天經）拍拖，你會唔會干預？
珠：唔會！我會畀佢好多自由，重叫佢有女朋友帶返嚟睇，女仔嚟到，我會盡量和顏悅色，好友善，等佢唔使拘束，我唔會限制個仔揀乜嘢對象，就算離過婚亦冇問題。
