黑超洛威拿寸爆
德國贏波，球迷出盡方法慶祝，就算自己嘅寵物都唔放過，有球迷特登幫狗狗扮靚靚，然後出街慶祝球隊入4強。呢隻洛威拿嘅主人都幾有心思，同隻愛犬着衫打扮不特止，仲買咗副黑超畀佢戴，行出街時真係搶盡風頭。雖然隻洛威拿好聽主人話，叫佢坐就唔敢企；不過，洛威拿始終係惡犬品種，就算打扮到幾靚仔，其他德國球迷都唔敢同佢合照。
李勇明
曾採訪世界盃、歐洲國家盃、奧運、亞運等大賽，身經百戰。
租儲物櫃要快手
每逢有世界盃比賽的城市，最搶手的不是酒店，而是車站的儲物櫃；每個不同尺寸的櫃，用1天由2歐元至10多歐元不等，深受一眾慳家球迷歡迎，至少睇完比賽，可以到火車站拿回行李，順道趕搭火車回家，省回不少酒店錢。只是儲物櫃數量有限，先到先得。昨日就試過連不是舉行賽事的法蘭克福fanfest車站儲物櫃，也在賽前3小時租清光。
徐嘉華
採訪過無數大賽，最鍾意捐窿捐罅搵題材，今次德國之行啱晒我。
德國差佬好親民
可能有唔少香港人對警察印象麻麻，但德國警察喺今次世界盃畀到我嘅感覺就非常好，唔出聲嗰陣的確威武神氣，但原來佢哋都會同市民或遊客球迷玩埋一堆，好親民。例如球迷要求合照，永冇耍手擰頭話做緊嘢唔可以玩，甚至叫警察幫手揸機都得。喺多蒙特更見過有德國警察整埋個攤位，幫球迷畫花臉及貼國旗。
朱冠恆
肩負現場直擊畀料重任，無論你當我名家抑或明燈，都希望交到功課。
