侍仔：噚日七．一遊行，真係旺丁唔旺我財啦，咁多人喺出面，但又唔肯入嚟飲番杯嘢先再行喎。
招積域：我蝕底啲過兩招個你，每年都有店舖送水畀市民㗎啦，邊有好似你咁守株待兔㗎！仲有呀，人哋係做正經嘢，點會好似平日咁行入嚟歎茶先？下次醒目啲啦，唔係你老細又話你啦！
今屆多正路強隊領風騷
菠蘿文：咁快又第4年遊行啦，世界盃一樣都係過得好快，眨吓眼星期二又到4強大決戰。8強戰真係有一個宿命喺度，新丁好多時過唔到8強呢一關。
招積域：咁講咪即係今屆賽事多正路波囉，我較深刻印象都係16強意大利對澳洲嗰場，真係差少少輸死人㗎！其他都唔太特別，一開波決定強隊贏波。
菠蘿文：講開新丁，烏克蘭真係同上屆嘅塞內加爾一樣，過唔到8強呢關。但兩隊實力係有分別嘅，烏克蘭一直都踢唔出水準，只係得贏沙地嗰場似樣啲；塞內加爾就真係畀到人「黑馬」感覺。
東歐球隊冇「安全感」
招積域：咁又係呀，東歐球隊永遠畀唔到賭徒一種「安全感」，一買佢哋就會中招輸錢。記憶中得保加利亞同克羅地亞真係掂嘅，今屆嗰啲就真係名不副實。
侍仔：揀男朋友咩，講到要有「安全感」。冇人迫你落注㗎喎，阿根廷夠安全啦，但咪又係出局。
菠蘿文：唉！上屆有巴迪高，諗住可以闖出死亡之組；今屆陣容咁強，但竟然12碼輸畀豆𡃁德國，自94年來始終闖唔過8強……比格文要辭職！有野兔同美斯唔用！留佢哋去到4強先用呀！
侍仔：咁勞氣做乜，咪等意大利喺4強收死德國囉！
文：高洛文