我一直睇好嘅奪標隊伍阿根廷，雖然俾德國淘汰，但個心真係唔服。成場波我覺得阿根廷絕對踢得好過主辦國，逐個球員去秤亦都贏德國，只不過雙方都打得比較謹慎，唔想失球在先，所以和波收場。
我認為阿根廷教練比格文調動球員不當，如果佢肯放膽去攻，絕對可以在90分鐘內KO德國。最激氣就係臨完場前，麥斯洛迪古斯被拿姆喺禁區侵犯，球證無畀12碼，有偏袒主辦國之嫌！
開賽前有位觀眾打嚟表示，德國可以贏到阿根廷純因主場之利。雖然我即場表示不同意，但亦非有意冒犯辯駁。我一直以為世界盃係100%實力大比拼，原來呢個想法太天真。
世界盃期間見到唔少錯判，足以影響賽果，不得不認同每場球賽都有人為因素牽涉其中。事後有拍檔認為此場球證是怯於主場壓力，而不敢吹罰12碼予阿根廷。心想算了吧！惟有慨歎世界真係唔公平。
默默支持英格蘭
我睇好阿根廷，純粹因為其實力；但英格蘭先係我深愛。大家都知我係英超迷，但英格蘭至今表現唔算太好，所以我一直都冇吹捧英軍，只係默默支持。
Wendy
兩年前歐國盃EuroBabes，今日已成為球彩台受歡迎主持。