世界盃8強激戰，阿根廷互射12碼俾德國淘汰就係人都知，而阿根廷網球手納賓迪安就為咗睇呢場波，專登叫賽會提前比賽兼轉場，卒之喺溫布頓網賽爆冷出局。
喺英國舉行嘅溫布頓網賽咁啱撞正世界盃，睇嘅人自然少咗，而溫布頓男單4號種籽納賓迪安出咗名係足球迷，佢為咗捧祖國阿根廷對德國場波，喺對住西班牙嘅華達斯高嗰場第3圈戰，特登要求賽會將場波提早啲打，賽會為配合佢嘅要求，惟有將場波調咗去草地較差嘅13號場打（通常較有名氣的球手會被安排喺較大嘅場地比賽，甚至係中央場），佢最後更以6:7、6:7、2:6，3盤直落被對手掃低。
02年曾打入決賽的納賓迪安早早了事，連佢自已都估唔到，之後佢仲趕到開波時間由頭睇到尾，但可惜祖國同佢遇上同一命運，對住德國先勝後被迫和，之後互射12碼仲輸埋出局。判官勸「賓仔」下次都係專心啲打波算數，唔好咁多心，無謂累己累人又累祖國啦！
判官話
納賓迪安捧場係好事，但佢因為顧住睇波而輸波，就唔係好合乎體育精神喇！小朋友，咪有樣學樣喎！
黑仔指數：★★★★
註：以5★為最高
專家話：收入豐厚影響不大
「納賓迪安為了看世盃而要求調場及提早開賽，明顯不夠專業，基本上心已不在網球，但這是他自己的選擇，始終一線網球手收入豐厚，輸了場波影響不大。」
何輝（廣東體育台嘉賓主持）
網民反應：呢啲咪叫唔專業囉
網民認同「納賓迪安啲黑氣累及阿根廷，而導致後者輸波」嗎？「黑仔咪打波，睇波樂趣多！」「嗱，呢啲咪叫唔專業囉。」「佢咁早出局，溫布頓又少啲睇頭。」
世盃判官歡迎球迷來稿
世盃判官係1個在世界盃期間專為廣大球迷而設嘅欄目，球迷如對賽事有任何投訴、意見，想同我哋分享，就快啲投稿！來稿勿過300字。
世盃判官體育版電郵：[email protected]
體育版傳真熱線：23703534