今屆世界盃已打咗一大半，好多球隊已經出局，多蒙特呢邊嘅氣氛有啲downdown哋。無法啦，自己鍾意嘅球隊出咗局，球迷都會靜啲嘅。不過，早前採訪咗咁多球迷，𠵱家趁空檔做個小總結，都係一個唔錯嘅時機。
如果要選最令人留下印象嘅球迷，綜合咗各位有線直擊隊隊員嘅意見之後，結果喺南韓球迷順利衞冕。記得4年前日韓世界盃，當年南韓打入4強全國歡騰，着住BeTheReds打氣衫嘅球迷坐滿晒球場，佢哋一齊揮動國旗同埋叫口號，氣氛簡直係震撼全球。
荷蘭fans扮嘢出色攞高分
4年後嘅德國世界盃，南韓雖然喺分組賽就出咗局，但查實班南韓擁躉喺3場分組賽嘅打氣表現，落力程度更勝以前；之前好多歐洲球迷都未見識過南韓迷嘅威力，今次佢哋都可以話算係大開眼界囉。
除咗南韓之外，荷蘭同瑞士球迷喺今屆世界盃嘅表現都值得畀好高分。荷蘭球迷出名扮嘢醒，專登扮獅子、扮女人嘅男球迷好出位，一班攝影哥哥當然歡迎呢班奇裝異服嘅球迷，都算係謀殺咗唔少菲林㗎。
仲有，荷蘭每逢有比賽，喺街上同埋球場外，總之有最多球迷聚集嘅地方，就一定有贊助商派禮物。通常啲電話套、氣球、毛公仔都係免費派發，你話荷蘭打波係唔係好過開嘉年華呢。
至於瑞士球迷，佢哋最勁就係戴帽到球場，幾乎每2個瑞士球迷就有一個會戴打氣帽。顏色通常都係紅色，但帽嘅設計就有好多款，真係睇到人眼花撩亂。
有線06世界盃嘉年華，將於今晚11:30pm——午夜1:30am，播出世盃外景隊採訪滙報
