旺角自從2000年起，主要街道西洋菜南街成為行人專用區（時段制）後，吸引了大量街頭表演者、藝術團體等到場表演，而且表演的題材愈來愈豐富，由最簡單的唱歌、話劇、行為藝術、甚至社區論壇都有。近排對岸的砵蘭街都唔執輪，吸引市區重建局、香港遊樂場協會同朗豪坊都玩埋一份，將整條砵蘭街封晒搞咗個大型嘉年華。嘩，今個夏天，旺角認真熱鬧！
記者：羅灝汶
攝影：陳陶鈞
砵蘭街轉攻街頭騷
唔使我講，大家都知道砵蘭街一向畀人印象都係烏煙瘴氣，而且黃色事業非常嚴重，不過隨着近年大型商場及酒店開幕，發展商為咗吸引客人及旅客，不斷大搞健康活動去改善形象。去年由原班人馬市區重建局、香港遊樂場協會及朗豪坊搞嘅「砵蘭街巡迴路演」就吸引咗超過3千名觀眾欣賞，今年就食過翻尋味搞咗個「動感博覽會@砵蘭街」。朗豪坊代表梁惠敏小姐表示：「今次我哋協辦呢個活動，係希望將嘉年華會帶到旺角區，提升旺角區活動同藝術氛氛，同埋推廣街頭文化，令呢區建立一個新形象。」而市建局及香港遊樂場協會都表示，舉辦嘉年華會可以提升砵蘭街的形象，幫助青少年循正式途徑去發揮才能，更加可以發揚街頭演藝文化，而且未來都會繼續舉辦類似活動，希望進一步推動砵蘭街嘅發展咁話。嘩，雖然答案好官方口吻，但其實想改變砵蘭街形象，不妨每星期都舉辦街頭騷，因為一年一次始終唔夠喉嘅！
世界高手跳彈床
上年「砵蘭街巡迴路演」就請咗何韻詩、鄭融及西班牙舞蹈家ClaraRamona到場表演，淨係Fans已經過千人。今年街頭騷就特意從英國請來彈床組合CrazyTramp，表演神乎奇技嘅跳彈床。Rocky同Andy曾於世界各地巡迴演出，不過今次就是第1次來到亞洲區表演，咪睇佢哋兩個「叔叔」身形好似水桶，其實佢哋練習跳彈床已經有25年，絕對是箇中高手，閒閒哋打360度空翻絕對無問題。加上2人受過專業小丑訓練，雖然只係兩個「肥叔叔」，但已經可以帶起所有觀眾嘅情緒。除咗有世界級高手坐鎮，現場更有香港小丑及「踩高蹺」表演，呢個嘉年華搞到每個路過嘅市民都勁開心。
MK街頭騷巡禮
平時閒日旺角行人專用區都會有不少團體舉行表演、論壇等等活動，當中有向當局攞正牌的團體活動，亦有藝術團體自己搞騷，其中基督教組織「生命加油站」更在每星期日都會舉行街頭表演，有歌唱、詩歌、分享會等等。而旺角街頭表演表表者的話劇團體「好戲量」逢星期五、六、日都會有一大班年輕人作街頭表演，有興趣嘅朋友不妨到場支持一下。不過上個星期雜技表演者蘇春就被警方票控，令近日來街上的自由表演者減少，睇怕想有個真正的街頭表演場地都唔係咁易。
百分百支持
街頭騷邊個都可以告
街頭藝人表演有機會觸犯《簡易治罪條例》中的「在公眾地方犯的妨擾罪」，一經定罪可判入獄3個月及罰款$500。記者曾向政府各部門求證哪些部門及會於甚麼情況下採取行動，結果發現原來警方、食環署、甚至康文署都有機會行使條例作出檢控。黃鶴鳴律師表示：「現有條文可給予不同執法部門執法，只是不同情況觸犯條例，就會有不同的相關人士去處理，例如表演聲浪太大對途人造成滋擾，都會引致環保署對藝人檢控，只不過同樣都是行使《簡易治罪條例》而已。」