美國加息1/4厘，美股急升，度度股市跟埋，恒指大漲逾400點。半年結，做埋櫥窗粉飾。恒指收16267，半年上升1391點，升幅9.4%，算唔錯，跑贏好多地方。
上半年恒指最高17328，𠵱家相差1061點。下半年，有機會再試上半年高位。
好友一朝報仇，升幅最大嘅50隻窩輪，排第50嘅升幅都有57%，排頭位嘅更加唔在講，係520%。
新地C輪：龍虎榜上3甲，都係新地C輪，佢哋係4499、9194、9819。
4499由冇得跌嘅1仙，彈上6.2仙。有30球易手，有1.2球金額嘅主人玩死亡遊戲。隻輪本月18日最後交易（24日到期），溢價8%，槓桿率127.7倍（有效25倍），引伸波幅29.2%。正股12個交易日內升唔到84.88元（昨日79.20元），隻輪就冇得剩。刀仔鋸大樹，好多時刀仔先斷而大樹無事。
9194喺7月中到期，行使價83.88元。9819喺8月初夠鐘，行使價88元。兩隻C輪，最後都係變廢紙居多。
恒指P輪：恒指P輪登上死火榜者有4476與2264。4476收3.8仙，散49%，溢價3.8%，槓桿率107倍（有效43倍），引伸波幅11.4%，本月28日到期。2264收1.8仙，散79%，溢價4.7%，槓桿率220倍（有效37.5倍），引伸波幅18%，亦係本月28日夠鐘。兩隻恒指淡友輪時日無多，最後都會作廢。炒末日輪，唔係個個啱，風險大，要先預咗輸得亁亁淨淨。
章盛