今日7.1，你會去邊？去有免費飯食兼有錢派嘅巡遊？抑或為咗一個夢想、為咗自己下一代，就算怕熱怕攰都參加7.1遊行呢？八方相信，如果係《蘋果》忠實讀者，一定會係後者。寧願犧牲半日，都要為普選出一分力，我哋冇法子用手去投票，就用腳，用一步一個腳印，踏出民主長路。
早幾日有位律師問：遊行有咩用？
中方搵人昅實
呢個問題好熟，03年有個基金經理、04年有位醫生都問過八方同一個問題，當時大家都認為23條一定通過，董生一定做多5年，遊行絕對唔會有用。結果點呢？假如當年大家唔係知其不可為而為，今日23條已成法例，《蘋果》可能被人封咗，《信報》可能執咗，陳太上港台開咪？未出廣播道已經拉咗都似。
雖然唔知今日遊行有幾多人，但聽聞中聯辦同特區政府都唔敢怠慢，搵人全程昅實，把握最新形勢。咁證明佢哋好重視遊行。泛民同佢哋一樣忙，但若果真係要數7.1大忙人，首推長毛，睇睇佢個活動時間表，由朝請願到晚，少啲體力都暈低。
長毛今日第一波，係晨早去金紫荊廣場，喺一眾高官睇緊升旗時請願示威。之後，佢又換回議員身份，走入會展參加回歸酒會；問佢會唔會再飲橙汁？佢笑笑口話：改飲紅酒囉，唔知會唔會照辦煮碗玩除衫？如果佢真係被逐離場，咁都幾好，因為佢話到時會返屋企休息一陣，或者睇吓世界盃精華片段，唞夠休息夠先落力去維園踢下半場。
長毛本來一早諗好喺今次遊行整隻「竹織鴨」送畀煲呔，諷刺佢無心肝、noheart、唔係有血有肉嘅人。事關佢做嘢時永遠「老闆」行先。無論市民爭取乜嘢，老闆OK佢就OK。可惜吖，由於呢隻竹織鴨好難整，所以最終都係整唔到，但咁唔係話煲呔無禮物收，因為長毛噚日已經四出搵紙紮舖，希望趕製一隻紙紮鴨。嘩，如果煲呔收到呢份大禮，肯定嬲到頭頂出煙。
今次遊行仲有好多道具，長毛個老友古思堯整公廁、一班勞工團體就會整兩個龍門，喺當中吊住個象徵最低工資嘅波，諷刺政府同商界將呢個問題拋嚟拋去，都係食住世界盃條水咁啦。講開世界盃，波友球迷就辛苦啲，可能今朝凌晨睇完世紀大戰，瞓幾粒鐘就去維園，張文就係其中一分子，但都有信心可以捱足全程。張超雄唔睇波，遊行可以有足夠體力頂住，不過佢會單拖上陣，因為太太要喺屋企照顧囡囡。八方有啲朋友，押後去旅行而去遊行；有啲同事