一講到冬瓜豆腐，中國人硬係諗到負面嘢「三長兩短」！不過從中醫角度，佢絕對係「正能量」食材；自小餐餐無「冬瓜豆腐」不歡嘅Aries，佢話兩者同樣有清熱利尿、消暑去腫的食療功效；𠵱家天時暑熱固然啱食，更重要係佢哋低熱量又飽肚，多食仲有減肥作用；冬瓜豆腐太寡口？Aries媽咪瞬即插口：「佢細細個就鍾意食佢哋嚟減肥，寡口？我用佢嚟煮九大簋都仲得呀！」
記者︰劉昱蘭
攝影︰何家亮
示範︰屯門讀者娟姐、Aries
豆腐煎餅 香口有咬口
價錢︰$14/4人
需時︰20分鐘
Aries自小無豆腐不歡，邊餐缺咗佢甚至絕食示威；媽媽就特別想出了這味𠱁細路仔菜；特別處係將壓爛嘅芙蓉豆腐，夾雜馬蹄、榨菜、木耳等香口兼有咬口嘢香煎，不過要減肥者留意，最好落少啲油同用易潔鑊煎，否則隨時變油煎餅！
材料︰
硬豆腐1件、馬蹄5粒、金針1/2杯、榨菜1/2包、木耳1/2両、鹽1/2茶匙、糖11/2茶匙、胡椒粉1/2茶匙、生抽1湯匙、雞湯3湯匙、生粉4湯匙、麻油小許
簡易法
1.硬豆腐用滾水煮3分鐘後瀝乾，壓成泥狀；將木耳、馬蹄、金針、榨菜切碎，倒入豆腐泥中，加入糖、生粉、鹽及胡椒粉拌勻；
2.燒熱油鑊，略炒豆腐泥，盛起待涼後，搓成多個小圓球；再燒熱油鑊，將小圓球落鑊，壓扁煎至焦黃後盛起；
3.燒熱油鑊，將生抽、雞湯、生粉及麻油煮滾成芡，淋在餅上即可。
貼士
如果炒過的豆腐圓球都係濕咗啲，沾啲生粉先去煎就OK嘞！
鹹蛋鯪魚煲冬瓜引出冬瓜鮮味
價錢︰$15/4人
需時︰15分鐘
冬瓜夠清，可食到蝦米同鹹蛋的鮮、鹹味，鯪魚肉煎完再煲，清新香口，又唔蓋過鹹蛋同蝦米的味道，咁多種食材混合，味道都啱啱好，真係用咗唔少腦力諗過度過，先有咁Perfect配搭。
材料︰
蝦米2両、鹹蛋1隻、冬瓜1斤、葱1棵、薑3片、鯪魚肉5両、水1碗半、雞粉1/4茶匙、生粉1/4茶匙、糖1/6茶匙
簡易法
1.葱切段；冬瓜去皮切塊；蝦米用凍水浸完瀝乾；鹹蛋黃切片；
2.燒熱油鑊，將鯪魚肉壓平煎至兩面金黃熟透後切粗條；
3.鯪魚肉放入滾水略煮，再加入冬瓜、葱段、薑片、蝦米及鹹蛋黃煮至熟透，以雞粉、生粉及糖埋芡。
貼士
淨番個鹹蛋白唔想浪費，淋埋落去做個蛋花賣相靚靚。
豆腐茄夾素食版煎釀三寶
價錢︰$16/4人
需時︰20分鐘
通常玩「煎釀」都會用鯪魚肉；今次調翻轉以豆腐作釀料，食得清之餘感覺仲好新鮮，尤為適合素食者。唔好以為豆腐、茄子冇乜口感，沾炸漿後煎，真係好脆口！不過重點係要用大火熱油，油份就唔會留在食材內。
材料︰
炸粉1/4包、硬豆腐1塊、髮菜1湯匙、茄子2條、鹽1/2茶匙、胡椒1/2茶匙、生粉2茶匙、甜麵豉3湯匙、水11/2湯匙、芫荽1棵
簡易法
1.髮菜浸一會後瀝乾；豆腐用滾水煮3分鐘後瀝乾，壓成泥狀，放入髮菜中，與鹽、胡椒及生粉拌勻；
2.茄子切片，中間切一道裂縫，塗小許生粉在茄子內，釀入豆腐泥；
3.炸粉開漿，茄子沾上漿放入滾油煎至金黃色撈起；
4.將甜麵豉、水、芫荽及小量鹽混合，放入油鑊炒香，成蘸點的醬料。
貼士
開粉漿後可加少少油，令雞扒蘸漿時可卸走啲漿，唔會點得過量。
瑤柱蟹肉燜冬瓜客家革新菜
價錢︰$45/4人
需時︰20分鐘
Aries媽咪識啲客家朋友，知道佢哋鍾意冬瓜蟹肉煲湯，攞冬瓜嘅清、蟹肉嘅甜，Aries媽咪靈機一動，夾埋一齊燜都應該好味道，加埋瑤柱就更鮮味。
材料︰
冬瓜1斤、瑤柱3粒、蟹12両、雞湯1/2杯、鹽1/2茶匙、糖1/2茶匙、生粉1茶匙、生抽1/2茶匙、水1/2杯
簡易法
1.蟹原隻蒸熟後拆肉；瑤柱浸10分鐘後撕成絲；冬瓜去皮切件；
2.燒熱油鑊，冬瓜略煮，落瑤柱，以雞湯、鹽、糖、生粉、生抽及水埋芡，蓋鑊燜10分鐘，上碟後放上蟹肉即成。
貼士
示範時最後先放蟹肉，最主要係為咗個賣相，如果想鮮甜啲，連蟹肉一齊燜仲好味。
冬瓜海帶紫菜湯皮光肉滑美容湯
價錢︰$18/4人
需時︰35分鐘
食冬瓜想瘦想靚，海帶有咁多骨膠原，都係保持皮膚光澤有彈性的秘訣，而紫菜有豐富碘質有營養，可謂一款清熱利尿、常飲常靚的湯水。
材料︰
冬瓜1斤、海帶1塊、紫菜1塊、瘦肉6両、水6碗、生抽1湯匙、糖1茶匙、生粉2茶匙、胡椒粉小許、鹽適量、麻油適量
海帶$2/包（a）
紫菜$15.2/25克（b）
瘦肉$9/246克（c）
簡易法
1.冬瓜切件；海帶切絲；紫菜撕碎；瘦肉切片後，以生抽、糖、生粉及胡椒粉拌勻；
2.煲滾水，放入冬瓜煮約20分鐘，水滾後加入肉片、海帶絲及紫菜滾10分鐘，最後加入鹽及麻油。
貼士
冬瓜皮比肉更有祛濕功效，所以滾湯時要連皮一齊放為最佳，而且又可以令冬瓜唔會散收收。