民主黨立法會議員李華明位於翠屏邨嘅辦事處，今個月8號差啲破財，有個30歲道友闖入企圖行劫，當時辦事處內只有清潔女工芳姨打掃，個道友仲拎起把鉸剪指嚇芳姨，芳姨臨危不亂，糾纏間出盡力咬咗個道友隻手臂一大啖，道友見芳姨咁勇猛，不敢久留奪門而逃，辦事處無財物損失。
肥仔明事後向觀塘警署報案，警方兩日後就喺區內一美沙酮中心拘捕一疑犯，經科學鑑證佢手臂上牙印，與芳姨棚牙係脗合嘅，該名道友被捕後寫咗封道歉信畀肥仔明，話自己食咗軟性毒品，神志不清而做出錯事。噚日肥仔明同芳姨去觀塘警署致送嘉許狀畀指揮官羅炳權總警司、反黑組同警民關係組探員（圖）。