藝人出書，有部份會以美容或美食作賣點，更多的純粹賣名氣。但楊采妮在書展中推出的新書，會結集她過去參與慈善活動的相片及個人感受，傳遞正面訊息，並可讓大家一窺她的內心世界。
做善事，不一定要公諸於世，向來喜歡小朋友的楊采妮，肩負聯合國兒童基金大使身份，到過貴州等地探訪外，昨日又到油塘一間天主教幼稚園作私人探訪，與一班小朋友齊齊淋花，體驗綠色校園生活，大受小朋友歡迎，爭相向她大爆同學仔間的秘密，度過了一個歡愉的下午。
掉稿紙欠環保
今年四月受洗的楊采妮，現時對周遭一切事物充滿愛心，談及書展推出的新書主題，她說：「其實我一直有個心願，係將我做過嘅慈善活動經驗同大家分享，好想通過本書將我每一次活動得到嘅啟發講出嚟，當中唔止小朋友，有關於婦女、疾病同災難嘅探訪，又有好似今日嘅活動講環保，畀大家了解唔同地方嘅生活，希望將正面訊息帶出嚟。」
早前楊采妮閉關一個月寫書，她坦言情緒會因所寫內容而起伏，更怪責自己不環保，她說：「我因為係用紙筆寫，一寫唔啱就掉紙，其實我都覺得唔環保，𠵱家我努力學習用手寫板，希望可以環保啲。」
採訪：馮美茵
攝影：陳順禎
鳴謝：天主教聖雅各伯幼稚園
髮型提供：HermanLaiof04Orient4
化妝提供：DephineChan
服裝提供：MarcbyMarcJacobs
