置地集團雖然係中區大地主，但近年一直都好低調，後生一輩更可能只係知道有置地廣場。不過最近置地好努力咁提高公司知名度，原因係要催谷新落成嘅約克大廈。
最近置地大賣廣告，介紹集團呢幢最新嘅收租商廈，仲講咗好多歷史，等大家知多啲。
置地集團喺1939年買入皇后大道中11至13號地段，用700萬將當年嘅St.Francis酒店改建成公爵行，83年再將公爵行同隔籬嘅公主行改建成公爵大廈同置地廣場東翼。
4年內中環唯一新商廈
唔講唔知，原來置地廣場係由多幢舊有嘅建築物拆卸，然後合併而成，當中包括告羅士打行、舊連卡佛行、溫莎行、公爵行同公主行呢幾幢大廈。
另外，告羅士打行前身仲係香港大酒店嚟㖭。睇完係咪有啲滄海桑田嘅感覺呢？近日個廣告又有新版本，就係出埋置地中環商業王國嘅地圖，總共13幢。
置地當然冇放過介紹自己嘅機會，集團喺1889年創立，持有同管理約500萬呎甲級商廈同商舖，係怡和集團成員之一。
至於約克大廈呢，前身係置地廣場東翼，有14層寫字樓，每層約8200方呎，另有7層商舖，今年10月正式啓用。
最緊要話畀大家知嘅係，約克大廈係2010年前中環唯一新商廈喎，個廣告有埋網址同租務熱線。呢個廣告認真資料豐富。
電郵地址：[email protected]