馬鞍山海典居錄得一宗近1500萬嘅成交，銀碼唔單止創全月新高，仲係區內過去年半以嚟，最大碼嘅交易。馬鞍山區向來以中細價樓為主，樓價多二、三百萬左右，上到五、六百萬已經好罕見，更何況過千萬。
中原張栢華話，事實上，區內耐唔耐都有單過千萬嘅成交，主要嚟自區內個別屋苑嘅特色單位，好似啱啱成交嘅海典居5座頂層複式，成交價高達1480萬元，單位面積2531呎，望全海景，呎價5847蚊，買家係換樓客，購入自用。
原業主大賺離場，佢喺02年938萬買入，4年間易手，賺542萬，升值58%。區內對上一宗咁大碼嘅成交，係04年12月，都係海典居複式，成交價1480幾萬。𠵱家海典居已經冇複式放盤，想買貴單位可以考慮同區嘅雅典居或者雅濤居複式，又或者樓齡新啲嘅海典灣相連戶，不過3個盤夾埋嘅放盤，都唔夠10個。