青藏鐵路終於通車，呢條被喻為目前世界海拔最高、最長嘅高原鐵路，唔少人已經慕名想去一坐，感受沿途壯麗風光。
中原地產同華懋集團食住呢個西藏熱潮，趁今日回歸紀念日推出優惠，凡喺回歸假期內購入上水維也納花園、馬鞍山迎濤灣同深井豪景花園，就送青藏鐵路旅遊，每個盤3個名額，總值7.68萬。另外又食埋世界盃條水，睇樓市民都有足球送。
華懋早排陸續將旗下貨尾盤減價或提供優惠清貨，集團售樓部經理吳崇武話，維也納花園同埋豪景花園仍然維持一口價，仲有家具套餐選擇。維也納花園有35伙未賣，賣晒可套現7000萬；豪景花園貨尾50個，值1.3億。至於迎濤灣亦有235個單位未賣，呎價3700至3800蚊，值10億。