英格蘭上場對住厄瓜多爾，都係靠碧咸一球世界波擊敗對手，略嫌贏得唔夠說服力。冇計啦！鬼叫英格蘭前中後三路，最弱就係前鋒線。事實上，英格蘭係以穩守突擊踢法為主，並不善於主攻。
捧英軍讓球「主勝」
傷兵方面，英格蘭除咗奧雲受傷肯定缺席外，其餘正選球員都可以披甲上陣，相反葡萄牙今場有迪高同哥斯天拿兩位中場主力停賽，大大減弱中場線嘅實力，難怪現時英格蘭要讓到平/半，仲要低水。
睇過兩隊喺決賽周4場賽事嘅表現，都非常穩定，不過今場最關鍵就係中場線，我會秤高英格蘭少少，揀個讓球「主勝」。
另一場心水係巴西對法國。巴西響今屆決賽周都冇受過考驗，贏嘅只不過係克羅地亞、澳洲、日本同加納等實力一般球隊，巴西中前場攻力就絕對唔使懷疑，不過後防就經常錯漏百出，4位後防主力頻頻上前助攻，漏洞相當之多，好在中前場攻力搭夠。
森巴攻力強難抵擋
法國上場擊敗西班牙，令人刮目相看，整體發揮出應有水準，但略嫌佢哋嘅攻力一般，亨利響國家隊嘅表現認真麻麻，反而老將施丹、韋拉同杜林等表現唔錯，可惜今場對住世界攻力最強嘅巴西，輸波亦都無話可說，一於簡單任務，揀主客和嘅主勝。
陳樹鵬（阿鵬）
有線球彩台主持
電郵：[email protected]