法國世界盃又對巴西；8年前法國決賽贏巴西3粒，全世界震驚；賽後搬出一大堆似層層嘅傳聞，又話朗拿度賽前抽筋嘔吐，又話黑手黨「做嘢」，連張家輝都興起，扮埋朗拿度一份。
「巴西贏梗，輸波一定係假波」充份顯示賭仔盲目嘅一面，今仗巴西再對法國，主勝得番1.65倍；喺巴西躉瘋狂落飛嘅情況下，盤口亦由讓半球轉到讓半/一，不過理智啲睇，巴西真係大把理由贏唔到法國。巴西上場贏加納3:0，收放自如確係好嘢，特別係領先1:0後，俾加納攻吓，一來練吓防守，二來練吓反擊都好。表面上巴西確係冇失波，不過防守力真係不敢恭維，左右二閘卡路士同卡富，極容易俾對手出波；一對中堅補位又有問題，如果唔係加納前鋒唔生性，巴西好難保不失。
朗拿度連續兩場有波入，好多人就以為，佢一定可以對法國有波入，叫做報番8年前之仇！不過坦白講，朗拿度同8年前已經冇得比；無疑「肥哨」單刀把握力仍然好高，不過爆發力已經冇晒，唔通杜林會驚一個喺禁區頂等人餵嘅前鋒？
講真呢隊法國又唔會係8年前嗰隊，不過防守力都叫做保持番7、8成功力；面對西班牙，真係搞到鬥牛勇士班前鋒「冇啖好食」；如果杜明尼治一心死守，巴西都唔容易咬得佢入，受讓半球真係賭得過。
英葡戰「細」波最穩
頭場又係「報仇波」，英格蘭對住葡萄牙，英格蘭兩次喺歐國盃輸俾葡萄牙，今場一定博；不過英格蘭面對停賽傷兵問題困擾嘅葡軍，只讓平/半，又好似少得滯；反而1.5倍嘅入球細真係最穩，因為小弟已經對英格蘭攻擊線死心了。
文：牽牛