20年前，有幸一家人半夜欣賞巴西對法國經典之戰，當時全家上下都為巴西球迷，惟有崇拜柏天尼嘅我捧法國。當晚歷史性三代同堂睇波嘅畫面，依然歷歷在目。
講番今晚場波。巴西今屆至今未受考驗，4戰全勝，論人腳質素，中前場火力肯定冠絕列強，但係踢波除咗講質素外，比賽狀態更加重要。決賽周前，巴西只曾約戰一、兩隊級數相距極遠嘅球隊拍跳，至今明顯有部份主力未喺最佳狀態，後防更常有漏洞。而之前4場比賽之中，形勢上亦略嫌被動。我對巴西隊能否在瞬間將所有潛能爆發，稍有保留。
淘汰賽利穩守球隊
法國隊反勝西班牙一仗演出被評為近幾年最佳絕不為過，一班富於經驗嘅中場令西班牙後輩上咗寶貴一課。過去4場，從統計數字顯示，巴夫斯平均1場唔會作出多於兩次嘅撲救，防線功不可沒，不過法國隊嘅所有實力似乎已經俾大家見晒，今場能否保持水準更為關鍵。
雙方球員非常熟路，肯定會有針對性部署，淘汰賽一向利防守較好嘅一方，90分鐘和波機會極大，捧受讓半球嘅法國，贏完盤再睇加時啦！
強尼有線球彩台「06世界Bar」主持
今日播影時間：9:00pm至5:30am
PHONE波熱線：1831678