如果係《小飛俠》Fans，相信你年紀都有番咁上下。雖然漫畫之神手塚治虫已經去世多年，不過佢留下嘅經典名作依然深入民心，早於3年前著名漫畫家浦沢直樹公布將佢偶像手塚代表作《小飛俠》中嘅其中一節故事「史上最大的機械人」改篇成最新漫畫《PLUTO》，經過年多於《BigComicOriginal》隔號連載後，慢工出細貨的浦沢直樹──《PLUTO》終於可以推出單行本，唔理你係手塚迷定浦沢迷，都無可能錯過！
記者：羅灝汶
攝影：伍慶泉
阿童木變大茄
浦沢直樹一直忙於連載《20世紀少年》，為咗新作《PLUTO》佢絞盡腦汁，特別請嚟手塚之子手塚真負責監修、「TEZUKAPRODUCTIONS」協力完成。《PLUTO》中大量角色都會有別於手塚當年嘅設定，只保留故事概念同主線，背景依然是未來世界，最特別的是男主角基斯克喺原作中的一個小角色──一個機械警察，而阿童木（小飛俠）只係一名茄喱啡。造型上，部份機械人完全以人類姿態出現，帶出人與機械根本不能分割，令人想起電影《A.I人工智能》及《智能叛變》。浦沢風格一向偏向深沉，以往《小飛俠》是兒童讀物，如今卻變成成人口味強烈的漫畫，集懸疑、推理於一身，再用上倒敍、插敍法令到劇情鋪排更加吊詭。
香港兩大漫畫家有Say
唔講唔知，原來香港兩大著名漫畫家劉雲傑（百分百感覺）及李志清（三國志），都係手塚治虫Fans，而且對於浦沢直樹的漫畫都有高度評價，究竟改編自手塚治虫的《PLUTO》佢哋又點講？劉雲傑：「浦沢出名分鏡出色，而且善於利用CloseUp鏡頭，用角色的主觀鏡向讀者說故事，令到故事更有張力，佢絕對係日本漫畫家用Closeup鏡頭最多嘅漫畫家，相反手塚的作品主觀鏡較少，改編後令到故事更有張力，不過弊病係會令到故事結局時張力得不到平衡。」
李志清：「我好喜歡《PLUTO》寫機械情的部份，特別是諾斯2號那篇的故事，透過角色的對白令到讀者非常感動。《PLUTO》雖然有大量改動，不過依然不離手塚提倡的寫情手法，呢一招用得相當高明。」
新舊造型比拼
巨型邪惡機械人PLUTO
原著故事的大壞蛋PLUTO，漫畫開首第一頁已經登場，絕對係《小飛俠》中的經典角色，不過《PLUTO》中PLUTO就以暗殺者的身份出現，看畢第一期都未找到他的蹤影。
日本方面已經推出了第2期單行本，封面是全新人設的阿童木，小飛俠的笑容唔知去晒邊。
http://www.bigoriginal.shogakukan.co.jp/pluto/
舊版基斯克
德國機械刑警基斯克，頭帶黑超，而且滿身都係機關槍。
VS新版基斯克
基斯克成為《PLUTO》中的主角，目標係調查機械人兇殺案，由機械人造型變成全人類，外表和舊版比較面目全非。
舊版諾斯
諾斯2號出場戲份超短，「漏斗」造型相當可笑，完全係一個管家Look。諾斯2號為咗迎戰PLUTO而伸出6隻機械手臂。
VS新版諾斯
諾斯2號的造型激似《烙印戰士》中的「鷹之團」團長古力菲斯。諾斯2號出擊迎戰時身上出現八爪武器，氣勢比舊版更強。
舊版布蘭度
布蘭度有點像《鐵人28》，不過全身都有刺釘作為武器。
VS新版布蘭度
布蘭度與舊版一點都不像，唯一似的就是巨型！而布蘭度其實係人類（右下圖），有妻有兒，同原版出入極大，機械人姿態是他穿上裝甲的模樣。
