碧咸的罰球令他出了一口烏氣，「你話我冇狀態，要做後備？」一球塞住所有「倒碧」的人口。雖然近年碧咸負面新聞多多，但唔少死硬Fans都好似我咁，對他仍不離不棄！泰國同香港一樣，半數以上的球迷都係捧英格蘭，英格蘭贏厄瓜多爾的一場，舉國歡騰，好似泰國贏咗波一樣。此行去泰國發現市內鋪天蓋地都係足球，皆因百事、adidas一浪接一浪的宣傳，空鐵站幾乎被百事佔據，全個月台都係佢哋的廣告，仲有呢個月的One-DayPass都係以百事球星做主角，如碧咸、亨利、朗拿甸奴……當然唔使多講，梗係日日買碧咸，盛惠100泰銖（約HK$20）。走到商場，3層樓高的adidas球星廣告當然有碧咸份；去到FoodCourt，見到有個百事特別版球星汽水杯，興奮到尖叫！我要，55泰銖（約HK$11），抵！但一下子要飲成公升汽水都幾攞命！
