昨日大市升成402點，雖然話就話半年結櫥窗粉飾，但息口漸趨明朗，外圍股市勁升，亦係大市上升主因。不過，小初對港股後市唔係咁有信心，所以趁高沽貨獲利。
早兩日提過鞋股利信達（738）同埋永恩（210），利信達配完股昨日復牌，雖然跌6.67％，收1.12元，但力保配售價1.10元樓上，算係對得住捧場客。至於size大好多嘅永恩（210）就愈戰愈勇，昨日再升5.41％，收4.875元，睇嚟有力再上。
至於同係鞋股嘅信星集團（1170），將在7月10日公布全年業績，昨日見到多間證券行列出買盤陣勢，股價亦升5％，收0.84元。
經紀黃話，信星作為一隻工業股，往績良好，但受到成本上漲同埋失去一名大客定單的影響，今次公布業績照計難有驚喜，所以叫小初慳番啖氣。雖然係咁，據講主力造鞋的信星，亦有意向大陸發展分銷業務，唔排除稍後會有併購活動都未定。
慕容小初