飛哥同陳太咁老友，眼見佢呢期俾人插得咁甘，都唔抵得幫吓口。佢噚日同陳太一齊做電台節目，佢話唔相信陳太會挑戰中央喎，又話又唔見陳太在位時，咁多人批評陳太？不過，飛哥都承認，民主派要喺選委會攞一百票真係唔易。
經常口大大講多咗嘅金勞詹噚日就同八方講，寫包單話陳太一定唔敢去馬，事關中央唔信佢，民主派喺選委會又未必夠一百票，唔係咁都肯玩呀？
金勞詹仲陰謀到咁話，話唔定陳太同煲呔係扯貓尾㗎咋，可能陳太知道自己出嚟之後，一定激到中央，屆時二揀一，中央唔撐煲呔都唔得，所以先至忍辱負重出嚟掩掩揚揚。咁兩個之中，邊個揀得落手啲？金勞詹耍手擰頭話兩個都係殖民地人啫……係兩個都揀唔落囉！
過多兩個禮拜，金勞詹就同太太飛去環遊世界，8月2日個特別大會點算好？金勞詹當然係一於唔理咁多，走為上着啦！