喺英格蘭周六出戰葡萄牙之前，好鍾意玩電話嘅巴西左閘卡路士，又send短訊畀碧咸，叫碧咸入多個罰球，而自己又入1個，咁之後大家就喺4強見喇！
睇睇卡路士個短訊先：「你為我入1個罰球，我為你入番個，之後大家就可以見面喇！」查實睇落都幾曖昧，但係大家都知，碧咸喺皇馬同卡路士好老友，兩個都鍾意去玩，兩個都對罰球有啲研究，熟起上嚟係好自然。但估唔到嚟到世界盃，卡路士仲夠膽同碧咸聯絡，喺16強已經叫碧咸入個罰球，卒之「萬人迷」真係入咗，兼幫隊波晉級8強㖭！
與此同時，英國就有賭波公司開盤，講明碧咸呢場入罰球嘅話，有6.5倍咁好分，加埋碧咸今次又有死黨嘅短訊支持，真係未出發先興奮，值得一博！但係有意投注嘅人請小心，因為足智彩暫時都未有得賭，有癮就𠵱家執包袱，飛過英國落注都未遲！（註：唔知你幾時睇到呢段報道。）
判官話
賭博呢家嘢真係博大精深，但係如果有啲騎呢嘢玩吓，話唔定會增加睇波時嘅樂趣，甚至連平時唔賭嘅都會玩埋一份。
贊成指數：★★★★
註：以5★為最高
專家話：特別盤口市場需要
「其實外國賭波公司除傳統大路投注項目外，大賽通常會開設特別盤口，因確有此市場需要，至於是否落注，基本上要看個人取向。」
何輝（廣東體育台嘉賓主持）
網民反應：有罰球賭就過癮
外界又覺得足智彩應唔應該開啲特別盤口畀大家玩呢？「馬會開我就瞓身支持！」「香港個馬會咁細膽，應該唔開啦！」「馬會喺歐國盃都開過類似嘅嘢，但係之後又無咗件事。」
世盃判官歡迎球迷來稿
世盃判官係1個在世界盃期間專為廣大球迷而設嘅欄目，球迷如對賽事有任何投訴、意見，想同我哋分享，就快啲投稿！來稿勿過300字。
世盃判官體育版電郵：[email protected]
體育版傳真熱線：23703534