3G筍餐豐儉由人　和記$88至抵玩

喺上星期，有3G機民因唔覺意「踩過界」，誤將GPRS當成3G咁玩，不斷上網，結果落樓要萬四蚊，認真淒涼！查實3G唔係乜嘢上等人玩意，唔好被嚇窒；只要聽清楚、問清楚，其實網絡商都有好多筍餐！不論你屬於「就住用」嗰隻、抑或喪玩豪傾嗰批，今日走勻全港4大3G網絡商，格好價俾你慢慢揀！

記者︰陸俊雄、陳國輝
攝影︰周旭文
Model︰阿智、Nicki（Salvador）
鳴謝︰X'SCafe（23844938）

點解用3GPlan俾人收多咗錢？係因為用家連一啲非指定網站都上埋。現時4間3G網絡供應商所推出嘅餐單，大多包括免費瀏覽該公司網站，免費睇啲精華快訊。至於想下載歌曲、影片等，同樣要收費，但其實已清晰列明。所以當瀏覽非指定網站時，記住問清楚費用詳情呀！

■上星期因呢筆「皮四賬事件」，令人誤以為用3G係高檔玩意。

■網絡商套餐超多，如果要逐張睇都幾花時間。

用2.5G玩慣低價Plan，通話量介乎1,000至1,500分鐘，咪以為3G唔啱你！現時和記嘅「3」香港就100蚊有找，啱晒慳儉人士「上車」。

「3」香港
★★★★1/2
帶Number轉台全港最平，近期仲出咗個$88低用量餐，基本話音有成2,100分鐘及80分鐘視像通話。不過有些少蠱惑，只係首3個月包80分鐘視像通話時間，其後即變回50分鐘。

數碼通
★★★1/2
最平個餐做緊$128，基本話音有2,000分鐘連30分鐘視像通話，包括可免費瀏覽部份頻道，另再送一個收費頻道例如博彩王、球迷狂熱等。項目清晰唔花巧，收費列明清晰，只欠唔夠平。

One2Free
★★★
都有提供畀低用量客戶嘅3G餐，1,000分鐘基本及25分鐘視像通話分鐘，簽1年合約仲可以任揀1個多媒體組合，如音樂、隨身TV等。不過最平玩都要$138，佢哋一向Sell服務質素，點取捨自己衡量喇！

Nicki
■其實對3G嘅收費一知半解，但佢都想試吓視像通話嘅感覺。佢仲話揀邊個台唔重要，因為係試玩試用，最緊要夠平，相信「3」都幾適合佢。

Sam
■用咗「3」已經好耐，可以話係最早一批用3G嘅朋友。直到現時為止，佢都好滿意「3」嘅服務，所以未諗過轉用其他公司。

自問同伴侶日對夜對仲未夠，每日搭車仲要機不離手嘅話，高用量3GPlan實啱你！佢唔單止視像分鐘特別多，仲可免費玩盡多媒體訊息兼瀏覽資訊㖭！

數碼通
★★★★1/2
以數記高用量嚟講，除7,000分鐘基本及300分鐘視像分鐘之外，最抵玩係每月再送200個PictureMail或者MovieMail，俾你瘋狂用手機拍低短片以及靚相，然後Send到另一方，唔使好似其他網絡商咁逐KB收費咁貴。

「3」香港
★★★★
以量取勝，唔單止包10,000分鐘基本及280分鐘視像通話分鐘，仲送多33個多媒體圖像或視像內容，假如你經常單撈新聞短片或者收睇MV內容，呢個高用量Plan啱晒鍾意死煲爛煲嘅人。

1010
★★★
最高3G套餐$348包2,200分鐘基本及150分鐘視像通話分鐘。查實以同價Plan嚟講，唔算太抵玩吸引，不過1010優勝在再送3,000分飛行里數，咁你話係咪「豪」先！

阿智
■佢啱啱唔見咗電話，正計劃試吓3G手機。第一考慮係服務質素，錢預咗畀多啲，最緊要接收效果同節目頻道。睇嚟數碼通或One2Free都幾啱佢呢類年輕人。

歐先生
■典型白領，佢話自己雖然用3GPlan，不過視像通話有幾多反而唔緊要，始終比較少用。而且佢另外有申請流動電郵服務，雖然唔算平，不過工作需要，冇計。

講到3G手機，絕大多數係由網絡商搭埋月費一齊推出，如果唔甘心俾合約綁死，不妨聽聽以下兩位先達手機Sales推介，睇吓邊部BestChoice適合你！

講到主流分唇，佢一定係我首選！N80配置320萬像素相機，可真正當DC咁用；而且有靚芒、Wi-Fi，就算唔經3G，上網或CheckEmail一樣冇問題。N80人氣勁旺，之前仲炒上$5,000幾，Calvin話仍然咁多人揀佢！

後生仔用機但求一個靚字，好似LG880就係最佳例子，機身非常薄，而且內置130萬像兼支援記憶卡，就算個款耐咗少少，我仍然會選擇佢！具備3G內涵，卻玩上2.5G嘅輕薄設計，拎出街當然唔失禮！

3G筍餐豐儉由人 和記$88至抵玩

3G筍餐豐儉由人　和記$88至抵玩