侍仔：今晚兩場8強賽事，我覺得係開波以來最難賭嘅一晚，陣容完整英格蘭對殘陣應戰嘅葡萄牙；仲有98年決賽翻版，巴西對法國！呢場真係要自己keep番record再三回味！
菠蘿文：我遊行完之後都返屋企預備睇波。巴西嗰場真係提早嘅決賽，98年嗰場我自己有錄低，打算今晚開波前再睇一次！個感覺應該會唔錯。有時呢啲波抱欣賞角度，比落注更有feel。
招積域：為咗開齋，我幾難賭都賭落去㗎啦！英格蘭陣容完整，葡萄牙冇咗迪高同埋哥斯天拿，中場得番老將費高，英軍應該贏得啦！
菠蘿文：既然有盞燈喺度，我就跟你買對家葡萄牙啦！你唔係第1日睇英格蘭波啩？你幾時有見過佢哋主攻呢？04年歐國盃外圍賽對住列支敦士登都係贏兩球，佢哋唔會對住葡萄牙贏到吓話？
費迪高：你咁講又有道理喎！葡萄牙世盃外圍賽對呢隊魚腩差啲輸埋㗎。照咁推論，英格蘭唔擅主攻，但贏到隊魚腩，而葡萄牙對一隊魚腩就陷入苦戰，即係英格蘭可以入到葡萄牙波，而葡萄牙又會發揮小宇宙反擊啦？一於重注入球大！有成2.47倍！
招積域：你不如買葡萄牙反勝啦，半全場「主/客」有27倍。
費迪高：雖然我心入面唔想呢隊咁符碌嘅英格蘭入4強，但葡萄牙今次「讓車馬」，中場無迪高，C朗又啱啱傷完，加上碧咸都講到明同費高玩體力，唔擔心就假囉，葡軍捧唔過。
法國往績佔優
招積域：巴西嗰場我貼法國贏！
菠蘿文：太好啦！你肯貼法國，我可以瞓身巴西。
費迪高：唔係喎，燈神今次有理由㗎喎，翻查兩隊近20年對賽往績，巴西只係92年贏過法國一次咁多！你話法國係咪贏得呢？
菠蘿文：踢波一場場計，今次為面子為冠軍為報仇，森巴兵一定同法國仔死過！順便送施丹退休一程！