早兩日無波打，我喺呢邊都唔係「無世藝」，去到邊都豎起隻收風耳。聽得最多嘅就係「lucky」，即係夠運，講緊德國同英格蘭，因為佢哋嘅對手踢8強時都分別有不利因素，好似鋪定路畀德、英兩軍入4強咁。呢段稿見報已知德國掂唔掂，今日我就話英格蘭靠運未必掂，對葡萄牙和波味濃，寧吼下盤。
呢日走咗去法蘭克福火車站附近嘅中式酒家，歎番「一盅兩件」，順便搵呢度班廣東人夥計傾下8強波經。其中阿財仔就同華度講：「班鬼佬講得無錯，阿根廷打完120分鐘至同你德國砌，英格蘭對住嘅葡萄牙又無咗迪高同哥斯天拿，對於德、英嚟講真係好彩；難怪呢兩隊波會提供兩款唔同讓球數嘅亞洲盤畀人玩，莊家直情好似畀機會大家煲重呢兩隊咁喎！」
先買和波臨場再「走地」
據財仔講，英格蘭對葡萄牙呢場，兩個上盤分別係英軍讓平/半低水，以及讓足半球高水。我認為英格蘭牌面好啲，有權贏埋的話，點會咁好死有個收高水嘅上盤畀你買？財仔連隨解畫：「呢邊玩得呢啲亞洲盤嘅都係華人多，當中又有大部份人都鍾意英格蘭，呢兩個上盤實唔怕無人買；我就決定去隔籬街投注站，落少少和波先，到開咗波睇過對唔對路，再玩『走地』都唔遲。」文：華度
採訪隊推介
華度心水：英格蘭和葡萄牙