今日係7月1日，03年50萬港人曾經上街反23條，結果23條要收回，葉劉同老董相繼下台，不過，煲呔上台後，香港人好似放慢咗腳步，一切等候中央發落，所以直到噚日，各方對出嚟遊行嘅人數都唔係太樂觀，而如果出嚟嘅人數少，煲呔同中央政府就大條道理話，香港人唔着緊民主，咁普選就更加遙遙無期。
爭取民主係要付出嘅，如果大家都想要民主，想有特首投票權，今日記住嚟維園。行出嚟未必即刻有得舉手投票，但唔行出嚟就一定冇！
民主派噚日晒冷做最後動員，希望多啲人響應出嚟遊行，公民黨黨魁余若薇就攞個雀仔風鈴出嚟話，雖然啲雀仔係向唔同方向飛，但啲鈴聲都係好和諧，就好似7.1遊行咁，總之有乜訴求唔緊要，一齊出嚟就得啦！
卿姐就派紙扇畀啲市民，怕今日參加遊行嘅市民熱親。除咗紙扇，前綫亦都會派吹氣棒，畀啲市民發吓聲，唔好淨係嗌口號咁單調喎，梁耀忠就喺度博命吹，都真係幾好氣。
