張栢芝喺愛情路上兜兜轉轉，男友如車輪轉，近排又傳佢情歸舊男友謝霆鋒，至於佢對上嗰位老外男友Jeroen似乎都已經有着落。前晚Jeroen喺蘭桂坊出現，同一位女伴喺酒吧飲嘢，兩個搵咗張細枱仔面對面坐，似乎傾得好投契。
旁若無人繼續傾
唔知Jeroen係咪因為已經習慣面對鏡頭，所以當發現有記者影相之後，竟然可以同女伴好輕鬆咁繼續傾，仲任影唔嬲，反而有老外酒客見到咁多記者圍住Jeroen影相，都忍唔住行埋去搭訕。
睇得出Jeroen應該特別鍾情東方女性，繼栢芝之後，今次約會呢個女仔應該都係東方人，氣質同栢芝一樣咁hot，又係長頭髮，至於靚唔靚，咁當然係各花入各眼喇！
如果栢芝的確已重投霆鋒懷抱，相信佢都會祝福老外前男友，快啲搵到個啱心水嘅女朋友啦！
