馮德倫昨日出席手機活動，大談手機拍短片的心得。他謂現時手機偷拍成風，故不會通街與女友莫文蔚親熱，更笑言不會自拍情慾短片，只會用筆繪下來留念。
馮德倫、楊崢和LisaS.昨日到尖沙嘴出席Nokia新手機發布會，三人輪流以手機拍短片分享感受，LisaS.追着現場的小貓拍攝，但小貓似乎甚高竇而不領情，俏皮地左扭右擰，令LisaS.相當尷尬。
「叫Mark減肥先」
馮德倫謂平日愛用手機拍攝場景，留作取景參考之用，問他可有用手機自拍情慾短片？馮德倫鬼馬地說：「我唔會，呢啲嘢係用筆素描啦。𠵱家多人用電話偷拍，我都唔會隨便喺街sweetsweet㗎。」提到節目《老馮日記》出街後反應熱烈，馮德倫說：「上次有集用咗副導嘅電話號碼，點知出咗街真係累咗佢，不斷有人打電話畀佢，話要搵舒淇同楊千嬅，我諗啲人都係撞吓，但真係煩到佢。」
對於千嬅有份參演《老馮日記》新一集，馮德倫說：「現實生活真係絕對唔會灌醉千嬅，我早知佢係千杯不醉。」提到軟硬天師重組，大受歡迎，問馮德倫可有意和雷頌德（Mark）重組Dry？他搞笑地說：「𠵱家點夠Soler嚟呀？我哋以前都係得一隻歌咋，雖然𠵱家都覺得自己OK，不過你哋要叫Mark減肥先啦。」此外，楊崢自爆將到德國睇世界盃四強賽事，她說：「我都掙扎咗好耐，因為要去幾日，推幾單工作。」
採訪、攝影：吳天慧
